FRANSADA 10 TON SİLAH AŞKAR EDİLMİŞDİR
Paris, 3 aprel (AZƏRTAC). Fransa jandarmlarının keçirdiyi əməliyyat nəticəsində ölkənin En departamentinin Peti-Aberjen şəhərində sabiq hərbçinin mənzilinin zirzəmisində gizlətdiyi 10 ton silah və hərbi ləvazimat aşkar edilərək götürülmüşdür. Bu barədə yerli polisin səlahiyyətli əməkdaşı məlumat yaymışdır.
Məlumatda bildirilir ki, sualtı qayığın 44 yaşlı keçmiş hərbçisi ailəsində zorakılıq hərəkətləri törətmiş və bu barədə polisə xəbər verilmişdir. Hadisə yerinə gəlmiş polis əməkdaşları mənzildə axtarış apararkən zirzəmidə yaxşıca gizlədilmiş əsl silah anbarı ilə rastlaşmışlar. Özünü silah kolleksiyaçısı kimi qələmə verən hərbçinin anbarında çoxlu sayda pulemyot, tüfəng, qumbara, kiçikçaplı tapança və mina aşkar edilmişdir.
“Kolleksiyaçı” cinayət məsuliyyətinə cəlb edilmiş və onun barəsində cinayət işi açılmışdır. Hazırda məhkəmə onun silah alveri ilə məşğul olub-olmamasını araşdırır.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
