Fransada meşə yanğınları baş verib
Paris, 2 iyul, AZƏRTAC
Fransanın cənubunda eyni vaxtda baş verən bir neçə meşə yanğınları nəticəsində ümumilikdə 1200 hektardan çox ərazini alov bürüyüb.
AZƏRTAC xəbər verir ki, Hero departamentində başlayan yanğın quraqlığın və güclü küləyin təsiri ilə qısa müddətdə qonşu Od departamentinə yayılıb. Yanğın burada 900 hektar ərazini əhatə edib. Yanğının söndürülməsi üçün 800-ə yaxın yanğınsöndürən səfərbər olunub. Hadisə bölgəsində bir neçə avtomobil yolu bağlanıb, zərərçəkənlərin yerləşdirilməsi üçün müvəqqəti sığınacaqlar yaradılıb.
Marselin şimalında yerləşən Roqnak və Lanson-Provens şəhərlərində də axşam saatlarında başlayan yanğınlar güclü külək səbəbindən sürətlə yayılıb.
Bildirildiyinə görə, Roqnakdakı yanğın nəzarət altına alınıb və təxliyə olunan sakinlər evlərinə qayıdıblar. Lanson-Provensdə isə yanğın məhdudlaşdırılıb, yaşayış evləri qorunub. Burada 260, Roqnakda isə 35 hektar meşə sahəsi yanıb.
Məlumata görə, yanğınlar nəticəsində mülki şəxslər arasında ölən və ya xəsarət alan yoxdur.
Bölmənin digər xəbərləri
