AZƏRTAC Bi-Bi-Si Nyus saytına istinadla xəbər verir ki, ənənəvi müsəlmansayağı geyimli və hicaba bürünmüş Fulla adlı gəlincik dünya şöhrətli Barbi gəlinciklərini ərəb ölkələrinin oyuncaq bazarından sıxışdırmağa başlamışdır. Fullanın brend-meneceri Fəvaz Abidin demişdir ki, islam ölkələri üçün uşaqlara, onların valideynlərinə doğma olacaq oyuncaq yaratmaq lazım idi. Valideynlər qızlarına Barbi tipli gəlincikləri çox könülsüz alırdılar. Fulla saf və qayğıkeşdir, atasına və anasına hörmətlə yanaşır. Ona görə də Barbidən yaxşı satılır. Çünki ərəblərin dəyərlərinə uyğun gəlir. O, heç vaxt açıq-saçıq geyinmir. Gəlinciklə birlikdə satılan dəstə çəhrayı namaz xalçası da daxildir.
Gəlinciyi 2003-cü ildə satışa çıxaran “NewBoy Design Studio” şirkəti hələ Barbinin dostu Kenin analoqunu yaratmaq niyyətində deyildir. Lakin Fulla-həkim, Fulla-müəllim gəlincikləri hazırlanır, çünki bu peşələr islam dünyasında mötəbər sayılır.
Fullanı Misir bazarına çıxarmaq üçün isə onun qarderobuna bir qədər dəyişiklik edilmişdir. Onun paltarları arasında nisbətən zəif ortodoksal müsəlman ölkələrində gənc qızların geyindikləri cins şalvarlar və cürbəcür yaylıqlar var.
