REGİONLAR
Füzuli rayonunda iqtisadiyyatın əsas sahələri üzrə uğurlu nəticələr qazanılıb
Füzuli, 18 aprel, AZƏRTAC
Füzuli rayonunda 2015-ci ilin birinci rübünün sosial-iqtisadi yekunları və qarşıda duran vəzifələrə həsr olunan yığıncaq keçirilib.
AZƏRTAC xəbər verir ki, yığıncaqda ilin üç ayında görülən işlər və qarşıda duran vəzifələr barədə məruzə dinlənilib, iqtisadiyyatın əsas sahələri üzrə uğurlu nəticələr qazanıldığı, regionların 2014-2018-ci illərdə sosial-iqtisadi inkişafı Dövlət Proqramında nəzərdə tutulmuş bir sıra tədbirlərin icrasına başlanıldığı, tikinti-quruculuq işlərinin davam etdirildiyi diqqətə çatdırılıb.
Bildirilib ki, hesabat dövründə rayonda ümumi məhsul buraxılışının həcmi 25646,7 min manat təşkil edib. Bu, əvvəlki ilin eyni dövrü ilə müqayisədə 4,3 faiz çoxdur. Ümumi məhsul buraxılışının 2485 min manatı sənaye müəssisələrinin, 10570,8 min manatı isə kənd təsərrüfatının payına düşür.
Məlumat verilib ki, hazırda Horadiz şəhərində Səfərbərlik və Hərbi Xidmətə Çağırış üzrə Dövlət Xidmətinin rayon şöbəsi, rayon statistika idarəsi və kənd təsərrüfatı idarəsi üçün inzibati binaların, Əhmədbəyli kəndində körpələr evi-uşaq bağasının, kənd xəstəxanasının, 1-11-ci Qayıdış qəsəbələrini birləşdirən avtomobil yolunun tikintisi davam etdirilir. Əhmədbəyli kəndində 340 şagird yerlik musiqi təmayüllü gimnaziya binasının, Bala Bəhmənli kəndində 60 çarpayılıq körpələr evi-uşaq bağasının tikintisi başa çatmaq üzrədir. Rayonun 3 yaşayış məntəqəsi qazlaşdırılıb.
Yığıncaqda təhsil, səhiyyə, mədəniyyət, idman, kənd təsərrüfatı və digər xidmət sahələrində görülmüş işlər təhlil olunub, uğurlarla yanaşı mövcud problem və çatışmazlıqlar da göstərilib, qarşıda duran vəzifələr müəyyən edilib.