MƏDƏNİYYƏT
Gənc pianoçuların II respublika müsabiqəsi qaliblərinin yekun konserti olacaqdır
Bakı, 18 iyun (AZƏRTAC). Xəbər verdiyimiz kimi, ölkədə fortepiano ifaçılığı sənətinin inkişaf etdirilməsi, gənc istedadların üzə çıxarılması, onların peşəkar ifaçılıq səviyyələrinin inkişaf etdirilməsi və dəstəklənməsi məqsədi ilə Mədəniyyət və Turizm Nazirliyi tərəfindən bu ilin may-iyun aylarında gənc pianoçuların II respublika müsabiqəsi keçirilmişdir.
Mədəniyyət və Turizm Nazirliyinin mətbuat xidmətindən AZƏRTAC-a bildirmişlər ki, 9-17 yaşlı uşaq və gənclər arasında 3 yaş qrupu üzrə keçirilən müsabiqədə respublikanın bütün bölgələrinin uşaq musiqi və incəsənət məktəblərindən 400-ə yaxın şagird iştirak etmişdir.
Müsabiqənin birinci turu mayın 30-dan iyunun 13-dək zonalar üzrə Bakı, Gəncə, Naxçıvan, Sumqayıt, Şəki şəhərlərində və Salyan rayonunda, ikinci turu isə iyunun 14 və 16-da Bakı şəhərində keçirilmişdir.
Müsabiqə Azərbaycan fortepiano ifaçılıq məktəbinin kifayət qədər yüksək səviyyəsini, uşaqlarla yaxşı işləməyi bacaran müəllimlərin, istedadlı gənclərin olduğunu nümayiş etdirmişdir.
Üzeyir Hacıbəyli adına Bakı Musiqi Akademiyasının prorektoru, Xalq Artisti, professor Yeganə Axundovanın sədrlik etdiyi, tanınmış musiqiçi və müəllimlərdən ibarət münsiflər heyətinin qərarına əsasən, 16 gənc ifaçı müsabiqənin laureatı adına, müxtəlif dərəcəli diplomlara və pul mükafatına layiq görülmüşdür.
Müsabiqədə uğurla çıxış edən şagirdlərə diplom, fəxri fərman və tərifnamələr təqdim edilmişdir.
Şagirdləri müsabiqənin laureatı olmuş Bakı şəhər R.Behbudov adına 2 nömrəli, Q.Qarayev adına 8 nömrəli, R.Hacıyev adına 15 nömrəli, L. və M.Rostropoviçlər adına 21 nömrəli, Ə.Bədəlbəyli adına 23 nömrəli, M.Maqomayev adına 26 nömrəli, G.Şaroyev adına 35 nömrəli, Abşeron rayon Xırdalan şəhər, Lənkəran şəhər H.Rzayeva adına 2 nömrəli, Naxçıvan şəhər 2 nömrəli musiqi məktəblərinin, Bülbül adına Orta İxtisas Musiqi Məktəbinin müəllimləri fəxri fərmanla təltif olunmuşlar.
İyunun 19-da Müslüm Maqomayev adına Azərbaycan Dövlət Filarmoniyasında müsabiqə qaliblərinin yekun konserti keçiriləcəkdir.