GƏNC PİANOÇUMUZUN UĞURU
Fevralın 10-13-də Fransanın Limoj şəhərində məşhur fransız bəstəkarı Fransis Pulənk adına müsabiqə keçirilmişdir. On ölkədən 30 iştirakçı ilk dövrədə fortepianoda öz ifaçılıq məharətini nümayiş etdirmişdir. Onların arasında Bakı Musiqi Akademiyasının yetirməsi, Fransa Ali Musiqi Akademiyasının aspirantı Murad Hüseynov da var idi.
İkinci dövrəyə cəmi səkkiz ifaçı buraxılmış, üçüncü dövrədə isə yalnız Fransa, Yunanıstan, Azərbaycan və Ermənistan nümayəndələri mübarizə aparmışlar. Birinci yer heç kimə verilməmişdir. Gənc Azərbaycan pianoçusu Murad Hüseynov 2-ci, Fransa və Yunanıstan nümayəndələri isə 3-cü yeri tutmuşlar. Ermənistan musiqiçisi müsabiqənin gərginliyinə tab gətirməyərək, üçüncü dövrənin gedişində səhnəni tərk etmişdir.
Soydaşımız 7 xüsusi mükafatdan 3-nə, o cümlədən, “Fransis Pulənk dostluq cəmiyyəti”nin təsis etdiyi ən yüksək mükafata layiq görülmüşdür. Cəmiyyətin mükafatını ona məşhur bəstəkarın ailəsinin nümayəndəsi təqdim etmişdir.
Müsabiqədən sonra yerli musiqisevərlərin xahişi ilə şəhərin ən böyük konsert salonlarından birində həmyerlimizin solo konserti təşkil olunmuşdur.
Fransa kütləvi informasiya vasitələri M.Hüseynovdan müsahibələr almış, “Fransa-3” televiziya kanalı fevralın 13-də onun barəsində qısa reportaj vermişdir.
Azərbaycanın Fransadakı səfiri Eleonora Hüseynova gənc pianoçunu və onun elmi rəhbəri Jak Laqardı qələbə münasibətilə təbrik etmiş, yeni yaradıcılıq uğurları arzulamışdır.
Əsgər Əliyev
AZƏRTAC-ın xüsusi müxbiri
PARİS
Bölmənin digər xəbərləri
