Bakı, 21 aprel, AZƏRTAC 

Əmlak Məsələləri Dövlət Komitəsi daşınmaz əmlakın kadastrının tərtibi, ölkə üzrə daşınmaz əmlakların elektron kadastr məlumat bazasının yaradılması ilə bağlı işləri sürətləndirib. Hazırda Gəncə şəhəri və Şəki rayonunun bütün ərazisini əhatə edən “Kadastr və daşınmaz əmlakın qeydiyyatı” layihəsinin icrası uğurla davam etdirilir. Layihənin əsas hədəfi bütün daşınmaz əmlakların kadastrının tərtibi, habelə daşınmaz əmlak üzərində hüquqların qeydiyyatında xidmət səviyyəsinin artırılması üçün rəqəmsal kadastr bazasının təmin edilməsidir.

Komitədən AZƏRTAC-a bildiriblər ki, bu məqsədlə layihə ərazilərində torpaq sahələri yüksək dəqiqliyə malik müasir avadanlıqlarla ölçülür, pay torpaqlarının və həyətyanı sahələrin faktiki ölçüləri və sərhədləri dəqiqləşdirilir. Ümumilikdə 255 min hektar ərazini əhatə edən layihənin icrasına 2013-cü ilin oktyabrından başlanılıb və 2016-cı ilin aprelinə yekunlaşdırılması nəzərdə tutulur.

Həyata keçirilən bu layihənin əhali (daşınmaz əmlak sahibləri), dövlət qurumları və yerli biznes üçün geniş imkanlar açacağı və fayda gətirəcəyi şübhəsizdir. Bəzi hallarda pay torpaqlarının koordinatları və forması ilə bağlı qeyri-dəqiqliklər müşahidə olunurdu. Bu isə həmin torpaqların sənədləşdirilməsi və istifadəsi ilə bağlı çətinliklər yaradırdı.

“Kadastr və daşınmaz əmlakın qeydiyyatı” layihəsi bir çox tərəfdən faydalıdır. Layihə daşınmaz əmlak bazarı ilə əlaqədar olan ən müxtəlif qrupların - əmlak sahiblərinin, dövlət qurumlarının və kommunal xidmətlərin fəaliyyətinə müsbət təsir göstərəcək. Daşınmaz əmlak üzərində hüquqların qeydiyyatı üçün lazım olan müddət minimuma endiriləcək. Rəqəmsal kadastr xəritələri bir çox hallarda qeydiyyat məqsədləri üçün kadastr ölçmə işlərinin çölə çıxmadan kameral şəraitdə icra edilməsinə imkan yaradacaq.

Əmlak sahibləri üçün layihənin faydası ondan ibarətdir ki, əmlakın qeydiyyatı zamanı onun hüquqi təhlükəsizliyi təmin olunur. Torpaq sahələri üzrə sərhədlər dəqiqləşdirilir. Daşınmaz əmlakın alqı-satqısı sadələşir. Kommunal məsələlər baxımından da layihənin faydası az deyil. Şəhərin kommunal xətləri lazımınca planlaşdırılacaq, enerji-kommunal müəssisələri və ətraf mühit təşkilatlarının fəaliyyətinə müsbət təsir göstərəcək.

Elektron kadastr məlumat bazası şəhərin planlaşdırılması üçün təməl sənədlər bazasıdır. Layihə nəticəsində torpaqlardan istifadə üçün planlaşdırma imkanı yaranacaq, şəhər təsərrüfatının idarə edilməsi işi təkmilləşəcək.

Layihə dövlət əmlakının özəlləşdirilməsi prosesinin sadələşməsinə də öz töhfəsini verəcək. Dövlət mülkiyyətində olan daşınmaz əmlak obyektlərinin özəlləşdirilməsi prosesi üçün zəruri məlumatların əldə edilməsi, qiymətləndirilməsi işi elektron kadastr məlumatları əsasında həyata keçiriləcək. Bununla da, bu proses əhəmiyyətli dərəcədə intensivləşəcək.

Layihənin digər mühüm nəticələrindən biri Azərbaycanda özəl mərzçəkənlər qurumunun formalaşması olacaq. “Kadastr və daşınmaz əmlakın qeydiyyatı” layihəsinin icrasında özəl mərzçəkən kadastr mühəndisləri və şirkətləri cəlb edilib. Bu proses mərzçəkənlər qurumunun formalaşması üçün başlanğıc olacaq.

Gəncə və Şəkinin timsalında ölkə tarixində ilk dəfə olaraq sistematik kadastr ölçmələri sayəsində hüquqların qeydiyyatı üçün davamlı, mükəmməl kadastr məlumat bazası və rəqəmsal kadastr xəritəsi yaradılacaq. Bununla, layihə ərazisindəki daşınmaz əmlak sahibliyi, yəni dövlət, xüsusi və bələdiyyə mülkiyyəti qəti dəqiqləşəcək.