Gəncədə “Teaching Knowledge Test” imtahanı təşkil ediləcək
Bakı, 26 sentyabr, AZƏRTAC
Dövlət İmtahan Mərkəzi (DİM) noyabrın 15-də Gəncə şəhərində TKT (Teaching Knowledge Test) imtahanı keçirəcək.
DİM-dən AZƏRTAC-a bildirilib ki, imtahan mərkəzin Gəncə Regional Bölməsində təşkil olunacaq. İmtahanda iştirak etmək üçün qeydiyyat oktyabrın 1-dək davam edəcək.
Kembric Universiteti Nəşriyyat və Qiymətləndirmə qurumunun rəsmi test mərkəzi olan DİM ingilis dili müəllimləri üçün bilik və bacarıqları beynəlxalq səviyyədə təsdiq edən TKT (Teaching Knowledge Test) kvalifikasiyasının 1, 2, 3, YL (Young Learners – azyaşlı öyrənənlərə dilin tədrisi), CLIL (Content and Language Integrated Learning – dilin məzmunla inteqrativ tədrisi) modulları üzrə imtahan təşkil edir.
Qeyd edək ki, DİM Kembric Universiteti Nəşriyyat və Qiymətləndirmə qurumunun rəsmi test mərkəzlərindən biri olaraq Kembric ingilis dili üzrə qiymətləndirmə (Cambridge English Qualifications), Kembric ingilis dili üzrə tədris (Cambridge English Teaching) imtahanlarını təklif edir. DİM tələb əsasında Kembric ingilis dili üzrə səviyyə testi (Cambridge English Placement Test - CEPT) də təşkil edir.
Əlavə məlumat üçün [email protected] ünvanına yazmaq olar.
Bölmənin digər xəbərləri
