Bakı, 27 noyabr, AZƏRTAC

Gənclər və İdman Nazirliyi dekabrın 1-dən başlayaraq “YERLİ” kənd gənclərinin inkişafına dəstək layihəsini həyata keçirəcək.

Nazirliyin mətbuat xidmətindən AZƏRTAC-a bildiriblər ki, layihənin əsas məqsədi kəndlərdə yaşayan gənclərə yeni biliklərin verilməsi, onların bacarıqlarının inkişaf etdirilməsi, eyni zamanda, sosial və biznes layihələrinin dəstəklənməsi ilə yerli şəraitdə məşğulluğun təmin olunması və yerli gənclər icmalarının yaradılmasıdır.

Layihənin əsas hədəfləri dövlətin müvafiq istiqamətlər üzrə siyasətinin mahiyyəti barədə kənd gənclərinin məlumatlandırılması, onların icma şəklində inkişafına və sosiallaşmasına sistemli dəstəyin göstərilməsi üçün yeni təsir alətlərinin tətbiqi, kənd gəncləri arasında qeyri-formal təhsilin inkişaf etdirilməsi ilə yeniliklər etməyi bacaran gənclər üçün şərait və imkanların yaradılması və onların beynəlxalq gənclər hərəkatına inteqrasiyası üçün analoji gənclər platformaları ilə əməkdaşlığın qurulmasıdır.

Ümumilikdə layihə kənd gənclərinin fərdi və peşəkar inkişafına, eyni zamanda, onların təşəbbüslərinin dəstəklənməsinə yönəlmiş yeni və fərqli platformadır. Layihənin həyata keçirilməsi ilə bağlı əlaqələndirməni təmin etmək məqsədilə Gənclər və İdman Nazirliyində dövlət orqanlarının, gənclər təşkilatlarının nümayəndələri və ictimai fəal gənclərdən ibarət işçi qrup formalaşdırılacaq. İşçi qrup təşkilati məsələlərin və cari işlərin həlli ilə məşğul olacaq.

Layihənin əsas komponentləri rayon və şəhərlərin, eləcə də kəndlərin müəyyən edilməsi, fərdi ünsiyyət əsasında layihə iştirakçılarının seçilməsi, təlimçi və mentor komandasının formalaşdırılması, iştirakçılar üçün təlim, seminar və görüşlərin keçirilməsi, gənclər icmasının yaradılması, təşəbbüslərin (layihələrin) dəyərləndirilməsi və dəstəklənməsi, qiymətləndirmənin aparılması və yekun hesabat tədbirinin keçirilməsidir.

Layihə “Azərbaycan 2020: gələcəyə baxış” İnkişaf Konsepsiyasında, “Azərbaycan gəncliyi 2017-2021-ci illərdə” Dövlət Proqramında və “Azərbaycan Respublikasında kənd təsərrüfatı məhsullarının istehsalına və emalına dair Strateji Yol Xəritəsi”ndə nəzərdə tutulan gənclərin potensialının və idmanın inkişaf etdirilməsinə, kəndlərdə yaşayan gənclərin ictimai həyatda daha fəal iştirakının təşviqinə və kəndin sosial-ictimai həyatında qadınların və gənclərin fəal iştirakının təmin olunmasına xidmət edir.