Bakı, 21 yanvar, Leyla Qurbanova, AZƏRTAC

Prezident İlham Əliyevin Sərəncamı ilə 2020-ci ilin Azərbaycanda “Könüllülər ili” elan olunması gənclərimizin öz potensiallarından maksimum istifadə etmələri üçün böyük stimul yaradıb. Dövlətimizin başçısı Azərbaycanın qüdrətli dövlətə çevrilməsi naminə həmişə gənclərə böyük meydan verilməsinin tərəfdarı olub, onların həm potensialı, həm fəallığı, həm də məsələlərə yeni baxışlarının cəmiyyət üçün lazım olduğunu vurğulayıb. Gənclərimiz onlar üçün yaradılmış bu imkanlardan geniş şəkildə yararlanır, cəmiyyətin inkişaf prosesinin avanqardına çevrilmək üçün əllərindən gələni edirlər. Dövlətimizin bizə göstərdiyi diqqət və qayğıya cavab olaraq gənclərimiz könüllülük hərəkatının daha da genişləndirilməsi üçün öz bacarıqlarından səylə istifadə edəcəklər.

Bu sözləri AZƏRTAC-a məxsusi müsahibəsində Azərbaycan Milli Karate Federasiyasının idman meneceri Anar Qurbanov deyib.

Federasiyada könüllülərlə fəaliyyətin 2015-ci ildə birinci Avropa Oyunlarından başlandığını deyən A.Qurbanov getdikcə bu işin daha sıx qurulduğunu vurğulayıb: “Azərbaycanda keçirilmiş birinci Avropa, həmçinin 2017-ci ildə ev sahibliyi etdiyimiz IV İslam Həmrəyliyi oyunlarında könüllülərimiz yüksək fəallıq nümayiş etdiriblər. Son iki ildə beş beynəlxalq səviyyəli mühüm idman tədbirində, o cümlədən “Baku Open” və Azərbaycanın Milli Qəhrəmanı Albert Aqarunovun xatirəsinə həsr olunmuş beynəlxalq turnirlərdə könüllülər bizə fəal dəstək veriblər. Elə könüllülər var ki, bütün yarışlarımızda iştirak edirlər. Federasiya rəhbərliyi, işçiləri onlara qayğı göstərirlər. Artıq Karate Federasiyasında könüllülərdən ibarət komandamız formalaşıb. Onları bəzən “karate uşaqları” da adlandırırıq. Hərdən digər tədbirlərdə də görüşür, müxtəlif mövzularda fikirlərimizi bölüşürük. Bu ilin martında Bakıda karate üzrə böyüklər arasında lisenziya xarakterli Avropa çempionatı keçiriləcək. Bu nüfuzlu yarış olimpiadaqabağı sonuncu təsnifat turniridir. İnanırıq ki, könüllülərimiz çox mühüm yarışlardan biri olan Avropa çempionatında da yüksək fəallıq nümayiş etdirəcəklər”.

Özünün də uzun müddət könüllü kimi fəaliyyət göstərdiyini, ölkəmizdə bu hərəkatın gənclərin hərtərəfli inkişafında mühüm rol oynadığını bildirən A.Qurbanov qeyd edib: “Özüm də uzun müddət könüllü kimi fəaliyyət göstərmişəm. “İrəli” İctimai Birliyinin tədbirlərində, “EYOF-2014” Gənclərin Avropa Olimpiya sınaq turnirlərində, Milli Gimnastika Arenasında, eləcə də digər təşkilat və arenalarda könüllü kimi çalışmışam. Komandada işləmək sahəsində təcrübəmizi hazırda könüllülərimizlə məmnuniyyətlə bölüşürük.

Sevindirici haldır ki, bu gün Azərbaycan dünyada çox sürətlə inkişaf edən ölkə kimi tanınır. Gənclərimiz əldə edilmiş uğurlarla kifayətlənməməlidirlər. İnanırıq ki, gənc könüllülərimiz bundan sonra da Azərbaycanın inkişafına sanballı töhfələr verəcəklər”.