Gəncliyə qayğı gələcəyə qayğıdır
Muxtar respublika gəncləri hərtərəfli qayğı əhatəsindədir
Naxçıvan, 2 fevral, R.Əliyev AZƏRTAC
“Biz yaratdığımız, qurduğumuz müstəqil Azərbaycan dövlətini gənclərə tapşırırıq. Bizim işimizi gənclər davam etdirməlidir”, - deyən ümummilli liderimiz Heydər Əliyev ölkəmizə rəhbərlik etdiyi bütün dövrlərdə sağlamdüşüncəli gənc nəslin yetişdirilməsini, gənclərin ölkənin sosial-iqtisadi, ictimai-siyasi və mədəni həyatında iştirakının təmin edilməsini diqqət mərkəzində saxlayıb.
Bu gün Ulu Öndərin əsasını qoyduğu dövlət gənclər siyasəti keyfiyyətcə yeni mərhələyə yüksəlib. Prezident İlham Əliyevin həyata keçirdiyi dövlət siyasəti nəticəsində gənclərimiz cəmiyyətimizin inkişafında fəal sosial təbəqəyə çevrilib. Azərbaycan gəncləri öz intellektual səviyyələri, bilik və bacarıqları ilə nəinki regionda, ümumiyyətlə, dünyada tanınır və qəbul olunurlar. Dövlətimizin başçısının gəncliyə göstərdiyi qayğının nəticəsidir ki, bu gün Azərbaycanda və onun ayrılmaz tərkib hissəsi olan Naxçıvan Muxtar Respublikasında ölkəmizin gələcəyinin təminatına çevrilən gənclik formalaşıb.
Muxtar respublikada gənclərin sağlam, vətənpərvər ruhda böyümələri, yüksək səviyyədə təhsil almaları, onların cəmiyyətin müxtəlif sahələrində fəal iştirakını təmin etmək üçün ardıcıl tədbirlər həyata keçirilir. Naxçıvan Muxtar Respublikası Ali Məclisinin Sədri Vasif Talıbov deyib: “Bu gün bizim qarşımızda bir vəzifə durur: Mənəviyyatca təmiz, intellektli və vətənpərvər gənclər yetişdirmək. Gənclərin bir yolu var. Bu yol ölkə Prezidenti tərəfindən uğurla davam etdirilən Heydər Əliyev yoludur. Hər bir gənc yaradılan yüksək şəraitdən və göstərilən dövlət qayğısından bəhrələnərək Vətəni və xalqı üçün layiqli vətəndaş olmağa çalışmalı, üzərinə düşən vəzifələri layiqincə yerinə yetirməli və ona göstərilən etimadı doğrultmalıdır”.
Naxçıvanda mənəviyyatca təmiz, intellektli və vətənpərvər gənclər yetişdirilir
Muxtar respublikada gənclərin yüksək səviyyədə təhsil alması, intellektual səviyyəsinin yüksəldilməsi, dünyagörüşünün formalaşması və asudə vaxtlarının səmərəli təşkili məqsədilə tədbirlər görülür. Bu gün Naxçıvanda Gənclər Mərkəzi, elektron kitabxanalar, mədəniyyət evləri, ali təhsil müəssisələrində yeni tədris korpusları, orta məktəb binaları, olimpiya idman kompleksləri, idman mərkəzləri və digər saymaqla bitməyən obyektlər tikilib və ya əsaslı təmir olunaraq gənclərin istifadəsinə verilib.
Gəncliyə qayğı gələcəyə qayğıdır. Ona görə də gənclərlə iş sahəsində həyata keçirilən tədbirlərin əsasını gənclərin ictimai-siyasi, iqtisadi və mədəni həyatda fəal iştirakı, sosial problemlərinin həlli, bu sahədə müvafiq dövlət proqramlarının qəbul olunması, gənc istedadlara dövlət qayğısının artırılması, elm, təhsil, iqtisadiyyat, mədəniyyət, dövlət idarəçiliyi və digər sahələrdə irəli çəkilməsi və onların xidmətlərinin qiymətləndirilməsi kimi mühüm tədbirlər təşkil edir. Naxçıvan Muxtar Respublikası Ali Məclisi Sədrinin “Naxçıvan Muxtar Respublikasında gənc istedadlara dövlət qayğısının artırılması haqqında” və “Naxçıvan Muxtar Respublikası Ali Məclisinin Sədri yanında Gənclər Fondunun yaradılması haqqında” fərmanları muxtar respublikada gənclərə göstərilən diqqət və qayğının davamıdır. Bu fərmanlarla Naxçıvan Muxtar Respublikası Gənc İstedadlarının “Qızıl kitabı” təsis edilib. Naxçıvan şəhərində Gənclər Mərkəzinin istifadəyə verilməsi gənclərin xüsusi layihələr vasitəsilə vahid bir məkanda toplanması, gənclərin inkişafı, onların asudə vaxtlarının səmərəli təşkili baxımından xüsusi əhəmiyyətə malikdir.
İdman və bədən tərbiyəsi gənc nəslin fiziki inkişafında və sağlam böyüməsində mühüm rol oynayır
Bu amil nəzərə alınaraq muxtar respublikada idmanın kütləviliyinə xüsusi diqqət yetirilir. Son illər muxtar respublikanın şəhər və rayonlarında olimpiya idman komplekslərinin, idman mərkəzlərinin, Uşaq-gənclər idman və şahmat məktəblərinin, orta məktəblərdə idman zallarının və açıq idman qurğularının istifadəyə verilməsi gənclərin hərtərəfli böyüməsinə xidmət edir. Yaradılan imkanlardan istifadə edən gənclər Azərbaycan və dünya miqyaslı yarışlarda və çempionatlarda uğurla iştirak edərək Naxçıvan idman məktəbinin adını yüksəldirlər.
Muxtar respublikada həyata keçirilən dövlət gənclər siyasətinin mühüm istiqamətlərindən birini də gənclərin sosial problemlərinin həlli, xüsusilə də mənzil şəraitinin yaxşılaşdırılması təşkil edir. Bu sahədə həyata keçirilən tədbirlərin davamı olaraq Naxçıvan şəhərində yeni yaşayış kompleksləri, Babək qəsəbəsində yaşayış binası tikilərək istifadəyə verilib, gənclərin güzəştli şərtlərlə mənzil sahibi olmaları üçün tədbirlər görülüb.
Muxtar respublikada həyata keçirilən dövlət gənclər siyasəti öz bəhrəsini verir
“Azərbaycan gəncliyi 2017-2021-ci illərdə Dövlət Proqramı”na uyğun olaraq hər il ölkəmizdə internet üzərindən aparılan səsverməyə əsasən bir şəhər Gənclər Paytaxtı seçilir. Ötən il Naxçıvan şəhəri ən yüksək səs toplayaraq 2018-ci ildə ölkəmizin Gənclər Paytaxtı seçilib. Bu, muxtar respublikada həyata keçirilən dövlət gənclər siyasətinin bəhrəsi, gələcəyimiz olan gənclərə göstərilən qayğının və onlar üçün yaradılan şəraitin nəticəsidir. Naxçıvan bu adı uğurla doğruldub, həmçinin Naxçıvan şəhərində bir sıra ölkə və beynəlxalq səviyyəli tədbirlər keçirilib.
Gənclərin hərtərəfli inkişafı, təhsilli, dünyagörüşlü, vətənpərvər və sağlam böyüməsi etibarlı gələcəyimizin təminatıdır. Muxtar respublikada həyata keçirilən dövlət gənclər siyasətinin hədəfi də bu mühüm vəzifənin uğurla yerinə yetirilməsidir.
AZƏRTAC-ın Naxçıvan bürosu
Bölmənin digər xəbərləri
