GENİŞ TƏRKİBDƏ GÖRÜŞ
AZƏRTAC-ın müxbiri xəbər verir ki, iyunun 4-də Naxçıvan Muxtar Respublikasının Ali Məclisində Azərbaycan Respublikasının Prezidenti İlham Əliyevin və Türkiyə Respublikasının Baş naziri Rəcəb Tayyib Ərdoğanın nümayəndə heyətlərinin iştirakı ilə geniş tərkibdə görüşü olmuşdur. Prezident İLHAM ƏLİYEV Baş nazir Rəcəb Tayyib Ərdoğana müraciətlə dedi:
- Hörmətli cənab Baş nazir, əziz qardaşım!
Hörmətli qonaqlar,
Mən Sizi Azərbaycanın qədim torpağı olan Naxçıvanda səmimiyyətlə salamlayıram bir daha “Xoş gəlmisiniz!” deyirəm. Sizin səfəriniz çox böyük əhəmiyyət daşıyır və əminəm ki, onun nəticələri də çox uğurlu olacaqdır. Biz xüsusilə bütün ikitərəfli, çoxtərəfli, regional məsələləri geniş müzakirə etdik. Bir daha gördük ki, bütün məsələlərdə bizim fikirlərimiz üst-üstə düşür və əlbəttə, gələcək illərdə çalışacağıq ki, bütün sahələrdə işbirliyi, qardaşlıq münasibətləri daha da inkişaf etsin. Bizim qarşımızda çoxlu layihələr var. Biz birlikdə bölgədə ən önəmli layihələri uğurla gerçəkləşdiririk. Bizim birgə fəaliyyətimizdən həm ikitərəfli münasibətlər, həm də bölgədə gedən proseslər xeyli dərəcədə asılıdır. Mən Sizinlə birlikdə Naxçıvana gəlmiş bütün dostlarımızı, qardaşlarımızı salamlayıram. Bəzilərini tanıyıram, bəzilərini ilk dəfə görürəm. Bu da çox əlamətdar hadisədir. Çünki Siz böyük bir heyətlə Naxçıvana gəlmisiniz. Bir daha demək istəyirəm ki, Naxçıvan qədim Azərbaycan torpağıdır və Türkiyə ilə Azərbaycan arasında yeganə sərhəd yeri buradır və o sərhəddə vaxtilə tikilən körpü yeganə keçid yeri olubdur. Ona “Ümid körpüsü” adı verilmişdir. Körpü tikiləndə, əslində, o, həyat körpüsü idi. Çünki Naxçıvanı mühasirədən çıxaran yeganə bir yol idi. İndi isə Naxçıvan da sürətlə inkişaf edir və Siz bu gün bunu görəcəksiniz. Əziz qardaşım, bir daha Sizi ürəkdən salamlayıram, xoş gəlmisiniz.
Sonra Baş nazir RƏCƏB TAYYİB ƏRDOĞAN çıxış edərək dedi:
- Əvvəlcə, çox təşəkkür edirəm. Gəldiyimiz andan etibarən istər mənə, istərsə də nümayəndə heyətimə göstərilən hörmətə görə xüsusi minnətdarlığımı bildirirəm. Bir müddət əvvəl Sizin nümayəndə heyəti Türkiyədə idi. Bizi orada məmnun etdilər. Təbii ki, Türkiyə və Azərbaycan qardaşdır və aramızdakı əlaqələr bütün sahələrdə - istər siyasi, istər hərbi, istər iqtisadi, istər ticari, istərsə də mədəni sahədə günbəgün inkişaf edir.
Biz buraya bir çox nazir dostlarımızla bərabər gəlmişik. Sərhəd şəhəri Naxçıvanda keçirəcəyimiz görüşlərin çox böyük mənası olacaqdır. Bu baxımdan biz buna çox böyük əhəmiyyət veririk. Mən xüsusilə Naxçıvanı görməyi çox arzulayırdım. Ötən səfərim zamanı bu istəyimi Sizə də söyləmişdim. Bugünkü görüşlərimizdən sonra edəcəyimiz ziyarətlər inanıram ki, bu səfərimizi daha da mənalı edəcəkdir.
Xüsusilə Sizin rəhbərliyinizlə Azərbaycan son dövrlərdə çox ciddi sıçrayış əldə etmişdir. Mərhum Heydər Əliyev tərəfindən başlanan inkişaf hazırda sürətlənərək davam edir. Təbii ki, bu inkişaf prosesi bölgədə Azərbaycanın əhəmiyyətini artırır. İnanıram ki, bundan sonrakı illərdə elm sahəsində görüləcək işlər gələcəkdə Azərbaycan gəncliyinin gücünü daha artıracaqdır.
Enerji məsələsində Azərbaycanın önəmi sayəsində Türkiyə bir tranzit rolunu oynayır. Bu sahədəki həmrəyliyimiz çox böyük önəm kəsb etməyə başlamışdır. Təbii ki, Bakı-Tbilisi-Ceyhan bunun ən böyük örnəyini təşkil etdi və Bakı-Tbilisi-Ərzurum isə ikinci bir nümunəsi oldu. Bütün bunlar həmrəyliyimizin ən gözəl nümunələridir. Allaha şükürlər olsun ki, Bakı-Tbilisi-Qars dəmir yolu yüksək bir nöqtəyə gəldi və qarşıdan gələn ayda layihənin Türkiyə hissəsinin təməli atılacaqdır.
 |
 |
Bölmənin digər xəbərləri
