GENİŞ TƏRKİBDƏ GÖRÜŞ
İyulun 3-də Azərbaycan Prezidenti İlham Əliyevin və Rusiya Prezidenti Dmitri Medvedevin təkbətək görüşü başa çatandan sonra iki ölkənin nümayəndə heyətlərinin iştirakı ilə geniş tərkibdə Azərbaycan-Rusiya danışıqları aparılmışdır.
Azərbaycan dövlətinin başçısı İLHAM ƏLİYEV qonaqları salamlayaraq dedi:
-Hörmətli Dmitri Anatolyeviç!
Hörmətli qonaqlar!
Sizi Azərbaycanda bir daha salamlamaq istərdim. Xoş gəlmisiniz! Sizin bu vəzifədə işə başlamağınızdan az sonra Azərbaycana rəsmi səfər etməyinizi biz çox yüksək qiymətləndiririk. Bu, bizim münasibətlərimizin xarakterinin və ruhunun göstəricisidir. Bu səfər ölkələrimiz arasında münasibətləri daha da möhkəmlədəcəkdir. Bu gün biz ikitərəfli və regional xarakterli məsələlərin çox geniş spektrini, beynəlxalq münasibətləri müzakirə etdik. Böyük razılıq hissi ilə qeyd etmək istəyirəm ki, danışıqlarımızın yekunları çox müsbətdir.
Ölkələrimiz arasında münasibətlər ənənələrə, tarixə əsaslanır. Dostluq, mehriban qonşuluq və strateji münasibətlər kimi səciyyələnən bu münasibətlər Azərbaycanın mənafelərinə və əminəm ki, Rusiyanın da maraqlarına tam cavab verir. Mən həmçinin əminəm ki, səfər çox uğurlu olacaqdır. Bizim müzakirə etdiyimiz, planlaşdırdığımız məsələlər, səfərin yekunlarına əsasən imzalayacağımız sənədlər yerinə yetiriləcək və ölkələrimiz arasında münasibətlər yeni səviyyəyə yüksələcəkdir. Bu münasibətlər bundan sonra da tərəfdaşlıq, strateji və dostluq münasibətləri kimi səciyyələnəcəkdir. Bu, Azərbaycanın milli maraqlarına tam cavab verir. Əminəm ki, bu səfər, - Siz Azərbaycanda əvvəllər də olmusunuz, lakin Prezident kimi buraya ilk dəfə gəlmisiniz, - və onun nəticələri müsbət olacaq, habelə ölkəmizlə, şəhərimizlə bir daha tanışlıq üçün yaxşı fürsət olacaqdır.
Xoş gəlmisiniz!
Rusiya Prezidenti DMİTRİ MEDVEDEV səmimi qəbul üçün təşəkkürünü bildirərək dedi:
-Hörmətli İlham Heydər oğlu!
Hörmətli həmkarlar!
Əlbəttə, Azərbaycan Qafqazda bizim strateji tərəfdaşımızdır. Mən tamamilə razıyam ki, bizi çoxəsrlik tarixi köklər və indiki tərəfdaşlığımızın xüsusi xarakteri, çox güclü əlaqələr birləşdirir və bu, həqiqətən, ən müxtəlif problemlərin həllində kömək edir. Bununla əlaqədar mən onu da demək istərdim ki, bir müddət əvvəl əmtəə dövriyyəsinin həcmini indiki meyarlarla yüksək səviyyəyə - təxminən 2 milyard dollara çatdırmaq barədə qarşıya qoyduğumuz məqsədə nail olmağa əslində yaxınlaşmışıq. Hətta son dörd ayda əmtəə dövriyyəsinin, demək olar ki, yarıbayarı artması müşahidə olunur. Yəni bu sahədə çox yaxşı potensial var. Onu da qeyd etmək lazımdır ki, söhbət təkcə enerji daşıyıcılarından deyil, həm də intellektual məhsullardan gedir, bu isə ölkələrimizin potensialını yaradır. Ona görə də mən bu səfəri mühüm hadisə hesab edirəm. Zənnimcə, bu gün biz Sizinlə həqiqətən çox mühüm, mürəkkəb, ciddi, lakin çox perspektivli məsələləri - qarşılıqlı əlaqələrimizi, həm ticarət-iqtisadi, həm də humanitar sahələrdə əməkdaşlığımızın perspektivli məsələlərini müzakirə etdik. Ümid edirəm ki, bizim həmkarlarımız vaxtı hədər yerə itirməyiblər, indi biz bəzi başqa məsələləri də müzakirə edəcəyik. Müzakirələrin yekunlarına əsasən hazırda əməkdaşlığımızın yüksək səviyyəsini səciyyələndirən müəyyən sayda yeni sənədlər, o cümlədən ölkələrimiz və xalqlarımız arasında dostluğa və qardaşlığa həsr edilmiş birgə Bəyannamə imzalanması nəzərdə tutulur. Bizi Azərbaycana dəvət etdiyinizə görə sağ olun.
######
Bölmənin digər xəbərləri
