GÖRKƏMLİ ŞAİRİN XATİRƏ GECƏSİ
Azərbaycan ədəbiyyatının görkəmli nümayəndəsi, xalq şairi Səməd Vurğunun əziz xatirəsi heç vaxt unudulmur. Bu günlərdə Milli Aviasiya Akademiyası şairin ev muzeyi ilə birlikdə xatirə gecəsi keçirmişdir.
Öncə S.Vurğun haqqında sənədli film nümayiş etdirildi. Sonra Akademiyanın rektoru Arif Paşayev XX əsr Azərbaycan ədəbiyyatının nümayəndəsi, xalq şairi S.Vurğunun çoxcəhətli yaradıcılığından və atası, yazıçı Mircəlal Paşayevlə onun səmimi, mehriban dostluğundan danışdı.
Akademiklər Budaq Budaqov, Camal Mustafayev, Əməkdar incəsənət xadimi, şair Nəriman Həsənzadə, yazıçı Şamo Arif və başqaları çıxış edərək böyük ədibin şəxsiyyətindən, vətənpərvərliyindən, xeyirxahlığından və ədəbiyyatımızın inkişafında onun əvəzsiz xidmətlərindən bəhs etdilər.
Akademiyanın tələbələri şairin şerlərindən nümunələr oxudular, Muğam teatrının üzvləri və bəstəkar-müğənni Elza Seyidcahan isə onun sözlərinə yazılmış mahnıları ifa etdilər.
S.Vurğunun qızı, Əməkdar mədəniyyət işçisi Aybəniz Vəkilova atasının xatirəsini əziz tutduqlarına görə tədbir iştirakçılarına dərin təşəkkürünü bildirdi.
Bölmənin digər xəbərləri
