İQTİSADİYYAT
Göyçayda tikinti-quruculuq işləri geniş vüsət almışdır
Göyçay, 29 iyul (AZƏRTAC). Göyçayda cari ilin 6 ayı ərzində görülmüş işlərə və qarşıda duran vəzifələrə həsr olunmuş hesabat yığıncağı keçirilmişdir.
AZƏRTAC xəbər verir ki, tədbirdə hesabat dövrünün rayonun sosial-iqtisadi həyatında uğurlu nəticə ilə yadda qaldığı, tikinti-quruculuq işlərinin geniş vüsət aldığı, infrastrukturun yaxşılaşdırılmasına, əhalinin problemlərinin həllinə diqqətin artırıldığı vurğulanmışdır.
Bildirilmişdir ki, 2013-cü ilin birinci yarısında rayon üzrə ümumi məhsul istehsalı 93,1 milyon manat olmuşdur. Rayon üzrə 9,3 milyon manatlıq sənaye məhsulu istehsal edilmişdir ki, bu da ötən ilin müvafiq dövrü ilə müqayisədə 13,2 faiz çoxdur. Rayonun tikinti təşkilatları tərəfindən 2,5 milyon manatlıq inşaat işləri görülmüşdür.
Qeyd edilmişdir ki, Yuxarı Şirvan kanalının Bığır kəndi ərazisindən keçən hissəsində inşa edilən 3 meqavat gücündə su elektrik stansiyasında tikinti işləri tam başa çatdırılmışdır. Göyçay şəhərinin su təchizatı və kanalizasiya sisteminin yenidən qurulması layihəsinin ikinci mərhələsi, Muğanlı-Yevlax avtomobil yolunun rayon ərazisindən keçən hissəsinin tikintisi, Göyçay-Ucar avtomobil yolunun yenidən qurulması işləri davam etdirilir.
Rayonda abadlıq, quruculuq və yaşıllaşdırma sahəsində xeyli işlər görülmüşdür. Şəhərin mərkəzində Bayraq Meydanının tikintisi və ərazinin abadlaşdırılması başa çatdırılmış, Heydər Əliyev prospektində çoxmənzilli binaların, Göyçay bələdiyyəsinin inzibati binasının fasad hissələri müasir üslubda üzlənmiş və dam örtükləri yenilənmişdir.
Hazırda şəhərin mərkəzi meydanında gənclər evinin, şahmat məktəbinin tikintisi sürətlə davam etdirilir. Rayon statistika və maliyyə idarələri üçün inşa edilən inzibati binalarda tamamlanma işləri görülür. Cari ilin ötən dövrü ərzində rayon ərazisində 15 mindən artıq ağac və bəzək kolları əkilmişdir. 2013-cü ilin yanvar-iyun aylarında fəaliyyətdə olan obyektlərin genişləndirilməsi və yenidən qurulması, kiçik və orta sahibkarlığın inkişaf etdirilməsi və görülmüş digər tədbirlər nəticəsində 436 daimi iş yeri açılmışdır. Bütövlükdə 2003-2012-ci illərdə rayonda 9590 yeni iş yeri açılmışdır ki, bunun da 8178-i və ya 85,3 faizi daimi iş yerləridir.
Diqqətə çatdırılmışdır ki, rayonun Ulaşlı-şıxlı kəndində 220 şagird yerlik tam orta, Şəkili kəndində 80 şagird yerlik ümumi orta məktəblər istifadəyə verilmişdir. Rayon əhalisinin təbii qazla təchizatının yaxşılaşdırılması sahəsində bir sıra işlər görülmüş, Cəyirli, Qubadlı-şıxlı, Bığır kəndlərinə təbii qaz verilişi bərpa edilmişdir.
Hazırda Göyçay şəhərində 40 yerlik uşaq bağçasının tikintisi davam etdirilir. Müskürlü kəndində 180 şagird yerlik, Qəbələ-Müskürlü və Alıkənd kəndlərində 80 yerlik məktəb binalarının tikintisi üçün layihə-smeta sənədləri hazırlanmışdır. Yaponiya hökumətinin dəstəyi ilə şəhər internat və 6 nömrəli tam orta məktəblərdə müasir normalara cavab verən sanitariya qovşaqları istifadəyə verilmişdir.
Yığıncaqda çıxış edənlər görülmüş işlər və qarşıda duran vəzifələr haqqında fikir mübadiləsi aparmışlar.