SİYASƏT
Göyçaylı gənclər Yeni Azərbaycan Partiyasının 20 illik yubileyini qeyd etmişlər
Göyçay, 21 noyabr (AZƏRTAC). Yeni Azərbaycan Partiyası (YAP) Göyçay rayon təşkilatının gənclər birliyi YAP-ın yaranmasının 20-ci ildönümü münasibətilə tədbir keçirmişdir.
AZƏRTAC xəbər verir ki, yığıncaq iştirakçıları əvvəlcə ulu öndər Heydər Əliyevin abidəsi önünə gül dəstələri düzərək xatirəsini ehtiramla yad etmişlər.
Mərasimdə YAP rayon təşkilatı gənclər birliyinin sədri Aytən Nəbiyeva çıxış edərək partiyanın yaranma tarixindən, keçdiyi şərəfli yolda əldə olunan uğurlardan danışmış, Yeni Azərbaycan Partiyasının üzvü olan gəncləri bu yubiley münasibətilə təbrik etmişdir. Bildirmişdir ki, YAP aparıcı siyasi partiya kimi fəaliyyət göstərdiyi iyirmi il ərzində bütün qüvvə və bacarığını xalqa xidmətə yönəltmişdir. Partiyanın yaradıcısı, ümummilli liderimiz Heydər Əliyevin zəngin təcrübəsi, müstəqil, demokratik və hüquqi dövlət quruculuğu yolunda gərgin fəaliyyəti ölkəmizin bugünkü və gələcək uğurlu taleyini müəyyən etmişdir. Azərbaycan düşdüyü siyasi, iqtisadi, sosial və mənəvi böhrandan ulu öndər Heydər Əliyevin rəhbərliyi altında xilas olmuş və inkişaf yoluna çıxmışdır. Bu gün YAP-ın sıralarında birləşən on minlərlə insan ümummilli lider Heydər Əliyevin ölməz ideyalarının davamçılarıdır.
Konfransda çıxış edən gənclər partiyanın yaranma zərurətindən, qarşıda duran vəzifələrdən danışmışlar. Qeyd edilmişdir ki, xalqımızın dahi oğlu Heydər Əliyevin rəhbərliyi ilə 1992-ci il noyabrın 21-də Naxçıvan şəhərində YAP-ın təsis konfransı keçirilmişdir. 1992-ci ilin dekabrında təsis olunan YAP Göyçay rayon təşkilatının sıralarında ilk əvvəl 540 nəfər partiya üzvü vardısa, hazırda rayonda 88 ərazi ilk partiya təşkilatında 7443 siyasi həmfikir birləşir. Onlardan 4246 nəfərini qadınlar, 2890 nəfərini isə 35 yaşadək gənclər təşkil edir. Cari ilin 9 ayında hakim partiyanın rayon təşkilatına 243 nəfər qəbul olunmuşdur.