Göygöl, 9 fevral, Rauf Hacıyev, AZƏRTAC

Ötən il Göygöl rayonunda istehsal və xidmət sahələrinin genişləndirilməsi, sosial obyektlərin tikilməsi, abadlıq quruculuq işlərinin aparılması istiqamətində həyata keçirilən tədbirlər davam etdirilib, iqtisadiyyatın dinamik inkişafı təmin olunub.

Prezident İlham Əliyev 2017-ci il avqustun 19-da Göygöl rayonuna sayca dördüncü tarixi səfəri zamanı insanların rahatlığına xidmət edən Qələbə parkının, müasir tələblərə cavab verən şəhər 4 saylı Körpələr evi - uşaq bağçasının, Çiçəkli Su Elektrik Stansiyasının, Göygöl şəhərində Zona Toxumçuluq, Aqrokimya, Baytarlıq laboratoriyalarının və Respublika Süni Mayalanma Mərkəzinin açılışında iştirak edib, həmçinin rayonun gələcək inkişafının istiqamətlərini müəyyən edən bir sıra tapşırıqlar verib.

AZƏRTAC-ın bölgə müxbiri xəbər verir ki, bu barədə Göygöl rayonunda 2017-ci ilin sosial-iqtisadi inkişafının yekunları və 2018-ci ildə qarşıda duran vəzifələrə dair keçirilən hesabat yığıncağında danışılıb.

Rayon icra hakimiyyətinin başçısı Arif Seyidovun məruzəsində qeyd olunub ki, 2017-ci ildə Göygöldə bir sıra tikinti, təmir-bərpa, yenidənqurma, abadlıq-quruculuq işləri görülüb və hazırda ölkə başçısı rayona səfəri zamanı Göy-Gölə gedən avtomobil yolunun tam yüksək səviyyədə təmiri üçün verdiyi tapşırığın icrasına başlanılıb.

Diqqətə çatdırılıb ki, 2017-ci ildə əsas kapitala 39 milyon 329,6 min manat investisiya qoyulub. Bundan 37 milyon 102,4 min manatı tikinti-quraşdırma işlərinə yönəldilib. Ümumtəhsil məktəblərinin və məktəbəqədər uşaq tərbiyə müəssisələrinin təmirinə və tikintisinə, onların maddi-texniki bazasının müasir tələblərə uyğun möhkəmləndirilməsinə göstərilən dövlət qayğısının nəticəsi olaraq 432 şagird yerlik Üçtəpə kənd tam orta məktəbi üçün yeni bina, Xasabağ kənd ümumi orta məktəbi üçün 40 şagird yerlik və Balçılı 1 saylı körpələr evi uşaq bağçası üçün modul tipli binalar tikilib, Qızılca uşaq bağçası təmir olunub.

Keçən il əhali tərəfindən ümumi sahəsi 13 min 532,9 kvadratmetr olan 95 ədəd fərdi yaşayış evi inşa edilib, Göygöl şəhərində 10 çoxmənzilli binanın dam örtüyü dəyişdirilib

“Azərbaycan İkinci Kənd İnvestisiya Layihəsi”nin maliyyə dəstəyi ilə Sarısu və Mollacəllilli kəndlərinə içməli su xətti çəkilərək bir hovuzlu bulaqlar tikilib.

2017-ci il iyunun 20-də rayon ərazisinə düşən iri həcmli dolu nəticəsində Şəhriyar, Gəncə, Göyçəkənd, Üçbulaq, Köşkü, Aşıqlı, Yeni Zod, Mixaylovka, kəndlərində 733 fərdi yaşayış evinin və 8 sosial obyektin dam örtüyünə dəyən ziyan aradan qaldırılıb.

Ötən ilin yekunlarına görə rayonda sahibkarların sayı 785 subyekt artaraq 5 min 849-a çatıb. Kiçik və orta sahibkarlığın inkişafına dövlət dəstəyinin nəticəsi olaraq sahibkarlığa Kömək Milli Fondunun xətti ilə 38 sahibkara 409 min manat güzəştli kredit verilib. Ümumdaxili məhsul istehsalında qeyri-dövlət sektorunun xüsusi çəkisi rayon üzrə 80,5 faiz təşkil edib. Rayonda fəaliyyət göstərən 23 sənaye müəssisəsi tərəfindən bütövlükdə 20 milyon 240,9 min manat dəyərində məhsul istehsal edilib, sənaye məhsulunun həcmində qeyri-dövlət sektorunun xüsusi çəkisi 51,1 faiz olub.

Keçən il 50 milyon 496,1 min manat dəyərində kənd təsərrüfatı məhsulları istehsal edilib ki, bunun da 99,3 faizi qeyri-dövlət sektorunun payına düşüb. 2017-ci ilin məhsulu üçün 8 min 190,3 hektar sahədə taxıl, o cümlədə 6 min 149,6 hektar sahədə buğda əkilib, 16 min 457,8 ton taxıl tədarük edilib. Bu ilin məhsulu üçün 8 min 69,3 hektar sahədə payızlıq taxıl əkilib ki, bunun da 5 min 748,8 hektarı buğdadır. Yüksək gəlir gətirən şəkər çuğundurunun əkin sahəsini genişləndirmək və fermerlərin şəkər çuğunduru becərilməsinə marağının artırılması istiqamətində müvafiq tədbirlər həyata keçirilib. Nəticədə 599,1 hektar sahədə səpin aparılıb və 17 min 492 ton çuğundur tədarük olunaraq təhvil verilib.

Əkin sahələrini suvarma suyu ilə təmin etmək məqsədilə rayon üzrə 180 subartezian quyusunda cari, 13 subartezian quyusunda isə əsaslı təmir işləri aparılıb. Prezident İlham Əliyevin müvafiq sərəncamlarına əsasən ötən il 8 subartezian quyusu qazılıb, 4 subartezian quyusunda isə qazıntı işləri davam etdirilir.

Ötən il rayonda iribuynuzlu mal-qaranın sayı 20 min 248 başa, xırdabuynuzlu mal-qaranın sayı 154 min 776 başa çatıb. Heyvandarlıq sahəsində yüksək göstəricilərə nail olmaq məqsədilə bu sahə ilə məşğul olan hüquqi və fiziki şəxslərə 2017-ci ildə 50 faiz güzəştlə lizinq yolu ilə 6 baş cins mal-qara satılıb. Beləliklə, cins mal-qaranın sayı 174 başa çatdırılıb. Eyni zamanda, süni mayalanma yolu ilə 250 baş cins bala alınıb. Ötən ilin müvafiq dövrü ilə müqayisədə süd istehsalı 139,2 ton, ət istehsalı 260,2 ton, yumurta istehsalı 5 min 300 ədəd artıb.

Keçən il qeydiyyata götürülən 1421 nəfər işləməyən vətəndaşdan 250 nəfəri işlə təmin olunub, 51 nəfərə isə işsizlik müavinəti verilib.

Məruzə və çıxışlarda uğurlarla yanaşı, problemlər də sadalanıb, onların həlli üçün təkliflər irəli sürülüb.

Prezident Administrasiyasının məsul işçisi Arif Novruzov və Milli Məclisin deputatı Rövşən Rzayev hesabat yığıncağında çıxış ediblər. Çıxışlarda regionların sosial-iqtisadi inkişafı Dövlət Proqramının icrasından, aqrar sektorda aparılan islahatlardan, ixracyönümlü məhsulların istehsalındakı müsbət dinamikadan söz açılıb, dövlətimizin başçısının qarşıya qoyduğu vəzifələr diqqətə çatdırılıb.

Hesabat yığıncağının sonunda qərar layihəsi qəbul olunub, toplantı iştirakçıları adından Prezident İlham Əliyevə müraciət qəbul edilib.