Günəşdə təhlükəli ləkələr aşkarlanıb
Bakı, 13 fevral, AZƏRTAC
Astrofiziklər tərəfindən Günəşdə nəhəng ləkələr yığıntısı aşkar edilib. Bu ləkələr güclü Günəş partlayışı təhlükəsi yarada bilər.
AZƏRTAC xəbər verir ki, bu barədə “Spaceweather.com” portalı məlumat yayıb.
NASA-nın Marsda gəzən “Perseverance” aparatı AR3576 geniş gün ləkələri qrupunu ilk dəfə olaraq ötən həftə aşkarlayıb, “MASTCAM” kamerasının köməyi ilə onun şəklini çəkib. Bu ləkələr azı 150 min kilometr uzanır və dörd tünd nüvəyə malikdir, onların hər biri Yer kürəsindən böyükdür. Onları Günəş tutulmasını müşahidə etmək üçün istifadə olunan adi eynəklə görmək mümkündür.
Müşahidələr göstərir ki, AR3576 mürəkkəb maqnit strukturuna sahibdir. Qrupun mərkəzi hissəsində müsbət və mənfi qütblər o dərəcədə sıx yerləşib ki, güclü Günəş partlayışlarını törədə biləcək maqnitli güc xətlərinin qapanma təhlükəsi var. “NOAA”nın (National Oceanic and Atmospheric Administration) proqnozlarına görə, Günəş ləkələri ən yüksək X sinifli partlayışlara səbəb ola bilər.
Hazırda AR3576 ləkələri Günəşin Yer kürəsinə çevrilmiş üzündədir və əgər mümkün partlayışlar koronal kütlə tullantıları ilə müşayiət olunarsa, o halda geomaqnit qasırğalarının yüksək riskinə səbəb ola bilər.
Bölmənin digər xəbərləri
