Gürcüstan əhalisi 1,1 faiz azalıb
Tbilisi, 29 aprel, AZƏRTAC
Gürcüstan əhalisi əvvəlki illərlə müqayisədə xeyli azalıb. 2022-ci il yanvarın 1-nə olan statistik məlumata əsasən, Gürcüstan əhalisinin sayı 3 milyon 688,6 min nəfər təşkil edib.
AZƏRTAC xəbər verir ki, bu barədə Gürcüstanın Milli Statistika İdarəsinin hesabatında bildirilib.
Sənədə əsasən, illik müqayisədə ölkədə əhalinin sayında 1,1 faiz azalma qeydə alınıb. Bildirilir ki, əhalinin 59,7 faizi şəhərlərdə, onların da üçdə bir hissəsi paytaxt Tbilisidə yaşayır. Azərbaycanlıların kompakt yaşadığı Kvemo Kartli bölgəsinin əhali sayı isə 434,5 min nəfərdir ki, onların da 191,3 mini şəhərlərdə, 243,2 min nəfəri isə kəndlərdə məskunlaşıb.
Yaş tərkibinə gəlincə, əhalinin 20,8 faizini 0-14 yaşlı şəxslər, 63,7 faizini 15-64 yaşlı şəxslər, 15,5 faizini isə 65 və ondan yuxarı yaşlı şəxslər təşkil edir. Gürcüstan əhalisinin 48 faizini kişilər, 52 faizini isə qadınlar təşkil edir. Kişilərin sayı 1 milyon 770 min nəfər, qadınların sayı isə 1 milyon 918,7 min nəfərdir.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
