GÜRCÜSTAN MDB-DƏN ÇIXACAQMI?
AZƏRTAC-ın xüsusi müxbiri xəbər verir ki, Gürcüstan parlamentində müxalif Respublikaçılar Partiyasından olan deputatlar ölkənin Avratlantik təşkilatlarına qoşulmağa çalışdığı bir zamanda onun həm də MDB-nin üzvü olmasını məqsədəuyğun hesab etmirlər. Onlar parlamentin geniş iclasında bu məsələni qaldırmış və gələcək iclaslarda ali qanunverici orqanın üzvlərinin Gürcüstanın MDB-dən çıxması prosesi üzərində müzakirəyə başlamalarını təklif etmişlər. Parlamentin sədri Nino Burcanadze MDB-nin heç bir səmərə vermədiyini, bəzi məsələlərin aşkarlanması üçün onun kürsüsündən istifadə olunduğunu bildirmişdir. Parlament əksəriyyəti fraksiyasının rəhbəri Maya Nediradze bu siyasi qərarın qəbul olunması zamanı həm iqtidarın, həm də müxalifətin eyni məsuliyyət daşıyacağını vurğulamışdır.
Gələn sessiya həftəsində parlament həmin məsələ ətrafında müzakirələrə başlayacaqdır. Bununla yanaşı, parlamentin sədri Nino Burcanadze bildirir ki, məsələ MDB-dən çıxmaq proseduru kimi deyil, ölkənin bu qurumda qalıb-qalmamasının müzakirəsi kimi gündəliyə salınmışdır.
Bölmənin digər xəbərləri
