GÜRCÜSTANDA DİZEL YANACAĞI BAHALANACAQDIR
AZƏRTAC-ın xüsusi müxbiri xəbər verir ki, Gürcüstan Neft Məhsulları İstehsalı, İxracı və İstehlakçıları İttifaqının sədri Vano Mtvralaşvilinin sözlərinə görə, yaxın vaxtlarda ölkədə benzinin bahalanması gözlənilmir. O bunun son həftə ərzində beynəlxalq bazarda benzinin hər tonunun qiymətinin 30-50 dollar ucuzlaşaraq 700 dollara düşməsi ilə əlaqədar olduğunu bildirmişdir. Hazırda Gürcüstanda Azərbaycandan alınmış 72 oktanlı benzinin litri 1,45-1,50 lari (1 dollar 1,65 laridir), Avropadan gətirilmiş “Premium” benzininin litri 1,654 lari, “Super” benzin isə 1,75 laridir.
V.Mtvralaşvili benzindən fərqli olaraq dizel yancağının qiymətinin artacağını bildirmişdir. O, bunu beynəlxalq bazarda dizel yanacağının hər tonunun qiymətinin 50-70 dollar artaraq 650 dollara çatması ilə əlaqələndirmişdir. Hazırda Azərbaycan və Türkmənistandan alınan dizel yanacağının hər litrinin qiyməti 1,30-1,35 lari, Avropadan gətirilən dizel yanacağının litri isə 1,50-1,55 laridir. Yaxın günlərdə dizel yanacağının bir litrinin qiymətinin 0,10 lariyədək bahalanacağı gözlənilir.
Bölmənin digər xəbərləri
