Gürcüstanda Giorqoba bayramı qeyd olunur
Tbilisi, 24 noyabr, AZƏRTAC
Gürcüstan pravoslav kilsəsi noyabrın 23-də Giorqoba bayramını qeyd edib.
AZƏRTAC xəbər verir ki, bayram ilə əlaqədar ölkənin bütün pravoslav kilsələrində dualar oxunub. Gürcüstanın Katolikos-Patriarxı II İlyanın iştirakı ilə paytaxt Tbilisidəki Müqəddəs Üçlük (Sameba) kilsəsində mərasim keçirilib.
Mərasimdə Gürcüstan Prezidenti Salome Zurabişvili, dövlət və hökumət rəsmiləri iştirak ediblər.
Qeyd edək ki, Giorqoba bayramı müqəddəs Giorqinin işgəncə ilə öldürüldüyü gündür. Gürcüstan pravoslav kilsəsi Giorqoba gününü ildə iki dəfə - mayın 6-da və noyabrın 23-də qeyd edir.
Müqəddəs Giorqinin tarixi eramızın III əsrində başlayır. Kappadokya bölgəsində zəngin ailədə dünyaya gələn Giorqi Roma imperatoru Diokletianın hakimiyyəti dövründə (284-305) sərkərdə olub. Giorqi xristianlığı müdafiə etdiyi üçün imperator tərəfindən cəzalandırılıb. Ondan xristianlıqdan imtina etmək tələb olunub. Bu tələbi yerinə yetirmədiyi üçün imperator Diokletian sərkərdəyə dəhşətli işgəncələr verdirib. Arabanın təkərinə bağlanan Giorgi boynu vurularaq edam olunur.
Bundan sonra xristian kilsəsi onu müqəddəs xilaskar olaraq qəbul edib.
Müqəddəs Giorqi gürcülər üçün qoruyucu mələk simvoludur.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
