Gürcüstanda NATO günləri başlayıb
Tbilisi, 3 oktyabr, AZƏRTAC
Oktyabrın 3-dən Gürcüstanda NATO günləri başlayıb.
AZƏRTAC xəbər verir ki, oktyabrın sonuna qədər davam edəcək NATO günləri çərçivəsində Gürcüstanın 10 müxtəlif bölgəsində 70 tədbir keçiriləcək.
Qeyd edək ki, bu gün Gürcüstan hökumətinin dəvəti ilə NATO nümayəndə heyəti Gürcüstana səfər edəcək. Nümayəndə heyətinə alyansa 29 üzv ölkənin daimi nümayəndələri və NATO Baş katibinin müavini Rouz Qütemüller daxildir.
NATO günlərinin ilk tədbiri kimi Baş katibin müavini Qərbi Gürcüstanın ali təhsil müəssisələrinin tələbələri ilə görüşəcək. Onun, həmçinin Gürcüstanın Prezidenti, Baş Naziri, parlamentinin sədri və digər hökumət nümayəndələri ilə görüşləri planlaşdırılır.
Səfər çərçivəsində baş tutacaq görüşlərdə NATO-Gürcüstan siyasi dialoqunun və praktiki əməkdaşlığının dərinləşdirilməsi, Gürcüstanın NATO-ya qəbul edilməsi və Qara dənizin təhlükəsizliyinin gücləndirilməsi, regionda gedən proseslər, mövcud münaqişələr və digər məsələlərin müzakirəsi nəzərdə tutulub.
Səfər çərçivəsində NATO-Gürcüstan Komissiyasının görüşü də keçiriləcək.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
