Gürcüstanda qrant almaq prosedurları çətinləşdirilib
Tbilisi, 12 iyun, AZƏRTAC
Gürcüstan parlamenti “Qrantlar haqqında” qanuna dəyişikliklərini üçüncü oxunuşda qəbul edib.
AZƏRTAC xəbər verir ki, qanun layihəsi 84 səslə təsdiqlənib.
Qanun layihəsinə olunan dəyişikliklərə görə, beynəlxalq donor təşkilatları və ya xarici dövlətlər tərəfindən texnologiya, ixtisaslaşdırılmış bilik, bacarıq və ekspertiza paylaşımı və digər yardım formaları qrant kimi qiymətləndiriləcək.
Bundan əlavə, qrantların verilə biləcəyi sahələrin siyahısına müdafiə və təhlükəsizlik sahələri də daxil edilib.
Qrant verən donor təşkilatların siyahısı da genişləndirilib və artıq “digər beynəlxalq təşkilatlar” da bu siyahıya daxildir. Bununla da, istənilən beynəlxalq təşkilat tərəfindən ayrılan vəsaitlər qrant statusu alacaq. Qrantın hüquqi əsası donorla qrant alan arasında bağlanan yazılı müqavilə və ya donorun yazılı qərarı ola bilər. Razılığın alınması üçün müraciətə 10 gün müddətində cavab veriləcək.
Qrantın razılıqsız əldə edilməsi qadağan olunacaq. Qadağaya əməl etməyənlər qrantın həcminin iki misli məbləğində cərimə ediləcək.
Qeyd edək ki, hazırda Gürcüstanda qüvvədə olan qanuna əsasən qrantın verilməsi üçün hökumətin və ya onun səlahiyyət verdiyi şəxsin və ya orqanın razılığı tələb olunur. Razılıq olmadan verilən qrantların qəbuluna icazə verilmir və bu cür hallara nəzarət Antikorrupsiya Bürosuna həvalə olunub.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
