DÜNYA
GÜRCÜSTANDA TERROR HADİSƏLƏRİ
Birinci olaraq ən böyük sosial bazaya malik olan və yeni hakimiyyətə gələn qüvvələrlə barışmaz mövqe tutan müxalifətçi Leyboristlər Partiyasının ofisi partladılmışdır. Bunun ardınca ən çox tamaşaçısı olan “İberiya” teleşirkətinin jurnalisti Lyuba Eliaşvilinin mənzili gülləbaran edilmişdir. Milli Demokrat Partiyasının lideri İrina Sarişvili–Çanturiya noyabrın 26-da xəbərdarlıq etmişdir ki, “ölkədə diktatura qurulmaqda və terror başlanmaqdadır”, ona görə də yanvarın 4-nə təyin edilmiş növbədənkənar prezident seçkilərinədək yarana biləcək milli və dini ifratçılığı vaxtında cilovlamaq üçün fövqəladə profilaktiki tədbirlər görmək lazımdır. Eyni zamanda, sabiq iqtidar təmayüllü “Yeni Gürcüstan uğrunda” seçki blokunun liderlərindən biri olan İrina Sarişvili–Çanturiyanın Tbilisidəki mənzili dekabrın 2-də gecə şəxsiyyəti hələlik müəyyənləşdirilməmiş şəxslər tərəfindən gülləyə tutulmuşdur. Evin pəncərələri sındırılsa da, xoşbəxtlikdən, sakinlərə xəsarət dəyməmişdir.
Xatırlatmaq yerinə düşər ki, doqquz il öncə, dekabrın 3-də İ. Sarişvili- Çanturiyanın həyat yoldaşı, Gürcüstan Milli Demokrat Partiyasının lideri Georgi Çanturiya Tbilisidə qətlə yetirilmişdir.