SİYASƏT
HEYDƏR ƏLİYEV BÜTÜN DÖVRLƏRDƏ ZƏKASI, CƏSARƏTİ, ÖZÜNƏ İNAMI VƏ SAFLIĞI İLƏ SEÇİLMİŞDİR
Bakı, 12 dekabr (AZƏRTAC). Azərbaycan xalqının əbədi lideri Heydər Əliyev 1969-cu ildə respublikaya rəhbərlik etməyə başladıqdan sonra rabitə sektorunda görünməmiş sürətli yüksəliş baş vermiş, respublikanın rabitə sistemi genişlənərək əsas yaşayış məntəqələrini əhatə etmiş, nəinki böyük şəhərlərdə, hətta ucqar kənd və qəsəbələrdə ATS-lər, poçt şöbələri, teleradioötürücü qurğular inşa edilmişdir.
Bu gün Fəxri xiyabana gələnlər arasında rabitəçilər də vardır. Onlardan biri də Prezident təqaüdçüsü Cəbrayıl Osmanovdur. Veteran deyir:
-Ümummilli liderimiz Heydər Əliyev dünya tarixində özünə layiqli yer tutan bir şəxsiyyətdir. Onun nəinki Azərbaycan, bütün dünya azərbaycanlıları üçün gördüyü işlər əvəzsizdir. Mən rabitəçi olduğumdan ulu öndərin ölkəmizdə bu sahənin inkişafı üçün gördüyü işlərin bilavasitə şahidiyəm. 1993-cü ildə o, hakimiyyətə qayıdandan sonra Azərbaycan milli rabitəsi yenidən qurulub inkişaf etdirildi. Ölkə rəhbərinin müdrik siyasəti nəticəsində tədricən bərqərar olan sabitlik şəraitində respublikaya xarici investorlar cəlb olundu. Rabitə sahəsinin inkişafında əsl dönüş də bundan sonra başlandı. Xarici rabitə şirkətləri, ilk növbədə Türkiyənin “Teletaş” və “Netaş” şirkətləri tərəfindən Bakıda, Sumqayıtda, Gəncədə və digər bölgələrdə elektron tipli müasir ATS-lər qurulmuş, “Aztelekom” İstehsalat Birliyində 2000 kanallı Beynəlxalq Telefon Stansiyası, 6150 kanallı respublikadaxili Şəhərlərarası Telefon Stansiyası, ABŞ-ın “Motorola” şirkətinin investisiyası ilə sellülar rabitə xidməti göstərən “Baksell”, Türkiyə rabitəçiləri ilə “Azərsell” və digər birgə müəssisələr yaradılmışdır. Bütün bunlar ulu öndər Heydər Əliyevin qayğısı sayəsində Azərbaycan milli rabitəsinin parlaq inkişaf yolunun başlanğıc mərhələsi idi. Heydər Əliyevin rəhbərliyi, diqqət və qayğısı sayəsində milli rabitəmizin keçdiyi möhtəşəm inkişaf yolu bu gün də möhtərəm Prezidentimiz İlham Əliyevin rəhbərliyi ilə, onun diqqət və qayğısı sayəsində fədakar rabitəçilərimiz tərəfindən böyük ruh yüksəkliyi ilə davam etdirilir.
Dünyada xarizmatik şəxsiyyətlər çox olub. Lakin Heydər Əliyev zəkası, cəsarəti, özünə inamı və saflığı ilə seçilmişdir. Xalqımız onu sevir. Nə qədər Azərbaycan yaşayacaq, Heydər Əliyevin də xatirəsi yad olunacaqdır. Belə şəxsiyyətlər yüz ildə, min ildə bir dəfə dünyaya gəlir.
Allah rəhmət eləsin, qəbri nurla dolsun.