AZƏRTAC-ın müxbiri xəbər verir ki, Azərbaycan Prezidenti İlham Əliyev oktyabrın 23-də Qobustan rayonunun Mərəzə qəsəbəsində xalqımızın ümummilli lideri Heydər Əliyevin adını daşıyan parkın təntənəli açılış mərasimində iştirak etmişdir.

Buraya toplaşan minlərlə sakin dövlətimizin başçısını və xanımını böyük hörmət və ehtiramla qarşıladı.

Prezidentə məlumat verildi ki, ərazisi 5 hektar olan parkda istirahət zonası yaradılmış, müasir üslubda musiqili rəngli fəvvarələr, süni bulaqlar qurulmuş, çoxlu oturacaq qoyulmuşdur. Ərazidə çəmənlik salınmış, gül kolları və ağaclar əkilmişdir. Uşaqlar üçün yelləncəklər, idman qurğuları var. Parkın ərazisində Yeni Azərbaycan Partiyası rayon təşkilatının qərargahı, uşaq və incəsənət mərkəzi, nikah binası tikilmişdir. Ulu öndər Heydər Əliyevin heykəli bu istirahət guşəsinə xüsusi görkəm verir. Postamentlə birlikdə hündürlüyü 6,1 metr olan, qranitdən və tuncdan hazırlanmış abidənin müəllifi xalq rəssamı, akademik Ömər Eldarovdur.

Prezident İlham Əliyev və Mehriban xanım Əliyeva parkla tanış oldular, ulu öndərin abidəsini ziyarət edərək gül dəstələri qoydular.

Sonra dövlətimizin başçısı parkın ərazisində yerləşən Heydər Əliyev muzeyinə gəldi. Muzeyin açılışını bildirən lenti kəsdi, ümummilli liderimizin həyat və fəaliyyətinin bütün dövrlərini əks etdirən fotostendlərə maraqla baxdı. Burada ulu öndərə həsr olunmuş kitablar, müxtəlif sənədlər də toplanmışdır. Bildirildi ki, rayon orta məktəblərində təhsil alan şagirdlər, eləcə də sakinlər muzeyə gələrək ulu öndərin zəngin irsini öyrənəcək, onun fəaliyyətinə dair videofilmlərə baxacaqlar. Prezident İlham Əliyev muzeylə tanışlıqdan sonra fəxri qonaqlar kitabına ürək sözlərini yazdı.

Sonra parkda rayon ictimaiyyətinin nümayəndələri ilə görüş keçirildi.

Prezident İlham Əliyev görüşdə nitq söylədi.