REGİONLAR
Heydər Əliyevin həyatı və siyasi fəaliyyəti çoxəsrlik dövlətçilik tariximizə qızıl hərflərlə yazılıb
Tərtər, 10 may, Tahir Ağaməmmədov, AZƏRTAC
Xalqımızın ümummilli lideri, böyük siyasi xadim Heydər Əliyevin anadan olmasının 94-cü ildönümü respublikamızın hər yerində olduğu kimi, Qarabağ bölgəsində də təntənə ilə qeyd edilib. Dahi rəhbərin anadan olmasının ildönümü münasibətilə müxtəlif tədbirlər, sərgilər və ağacəkmə aksiyaları keçirilib.
AZƏRTAC xəbər verir ki, mayın 10-da minlərlə tərtərli rayonun mərkəzi meydanında Ulu Öndərin xatirəsinə ucaldılmış abidə kompleksini ziyarət edərək, önünə tər gül-çiçək dəstələri düzüb, dahi rəhbərə öz hörmət və ehtıramını, ümumxalq məhəbbətini nümayiş etdiriblər.
Sonra Tərtər şəhərindəki Heydər Əliyev Mərkəzində “dəyirmi masa” keçirilib. İştirakçılar əvvəlcə Ulu Öndərin həyat və fəaliyyətini əks etdirən eksponatlarla tanış olublar.
Tədbirdə çıxış edən Tərtər Rayon İcra Hakimiyyətinin başçısı Müstəqim Məmmədov bildirib ki, Azərbaycanın dövlətçilik tarixində ən şanlı və parlaq səhifələr ulu öndər Heydər Əliyevin respublikamıza rəhbərlik etdiyi illərə təsadüf edir. 1969-1982-ci illərdə Ulu Öndərin apardığı uğurlu islahatlar nəticəsində Azərbaycan keçmiş ittifaq respublikaları arasında birinci sıralarda yer alıb. Əslində, müstəqil Azərbaycanın indiki iqtisadi inkişafı, sosial tərəqqisi və ictimai-siyasi sabitliyin davamlılığı həmin illərdə Ümummilli Lider tərəfindən müəyyən edilmiş kompleks islahatlar strategiyasının, düşünülmüş uzunmüddətli siyasi kursun davamıdır.
Diqqətə çatdırılıb ki, Ulu Öndərin Azərbaycana rəhbərlik etdiyi illərdə Tərtər rayonunun iqtisadiyyatında da böyük dönüş yaranıb. Həmin dövrdə Tərtər ildə 35-40 min ton pambıq verən, böyük maldarlığa malik olan, sənayesi dirçələn bir rayona çevrilib. Tərtər şəhərində çoxmərtəbəli evlərdən ibarət qəsəbə salınıb, 8 beşmərtəbəli yaşayış binası tikilib, 2300 ailəyə həyətyanı torpaq sahəsi verilib. Rayonda elektromexanika, pambıqtəmizləmə, konserv, süd emalı, yol-tikinti materialları istehsalı zavodları, Sərsəng su anbarı məhz Heydər Əliyevin ölkəyə rəhbərlik etdiyi illərdə tikilib.
Qeyd edilib ki, ümummilli lider Heydər Əliyev xalqın təkidli tələbi ilə ikinci dəfə hakimiyyətə gəldikdən sonra Azərbaycan regionda təhlükəsizliyin qarantına, dünyada aparıcı söz sahibi olan dövlətlərdən birinə çevrilib.
Tədbirdə Yeni Azərbaycan Partiyası (YAP) sıralarına yeni qəbul olunmuş gənclərə üzvlük vəsiqələri, Ulu Öndərin 94-cü ildönümünə həsr olunmuş inşa yazı müsabiqəsində, şahmat birinciliyində, gənclərin intellektual yarışında fərqlənənlərə diplom və qiymətli hədiyyələr verilib.
Sonra rayonun idarə, müəssisə və təşkilatlarının kollektivlərinin, eləcə də ictimaiyyət nümayəndələrinin iştirakı ilə ağacəkmə aksiyası keçirilib. Aksiya zamanı Tərtər-Goranboy, Tərtər-Bərdə, Tərtər-Ağdam avtomobil yollarının kənarlarında, şəhərin Heydər Əliyev prospekti və mərkəzi küçələrində, kənd yaşayış məntəqələrində 5 mindən çox Eldar şamı, çinar, qovaq, söyüd, zeytun və yerli iqlimə uyğun digər ağac tingləri, 6500 gül kolu, həmçinin müxtəlif növ dekorativ çiçəklər əkilib. Ərazidəki yaşıllıq sahələrində təmizlik işləri aparılıb, yeni əkilən ağaclar suvarılıb və aqrotexniki qaydada qulluq göstərilib.
Axşam saatlarında Heydər Parkında Ulu Öndərin 94-cü ildönümünə həsr olunmuş konsert olub.
X X X
Ulu öndər Heydər Əliyevin anadan olmasının 94-cü ildönümü Yevlax şəhərində silsilə tədbirlərlə qeyd edilib.
Tədbir iştirakçıları şəhərin mərkəzi meydanında Ulu Öndərin abidəsini ziyarət edib, önünə tər gül-çiçəklər qoyublar.
AZƏRTAC xəbər verir ki, Yevlax Şəhər İcra Hakimiyyəti və YAP Yevlax şəhər təşkilatının gənc fəallarının iştirakı ilə iməcilik və ağacəkmə aksiyası keçirilib. Aksiya zamanı şəhərin Heydər Əliyev, Bakı prospektlərinə, Yevlax-Bərdə yolu istiqamətində 1150 ədəd Eldar şamı, çinar ağacları, 6 mindən çox dekorativ və gül kolu əkilib. Şəhərətrafı və Kür çayı sahili, İpək yolu boyu ərazilər tullantılardan təmizlənib, abadlıq işləri aparılıb.
Həmçinin YAP Yevlax şəhər təşkilatının keçirdiyi inşa yazı müsabiqəsinin qaliblərinə fəxri fərman və hədiyyələr təqdim olunub.
X X X
Mayın 10-da ağdamlılar Ümummilli Liderin Quzanlı qəsəbəsindəki abidəsini ziyarət edərək, önünə gül dəstələri düzüblər. Mərasimdə rayon rəhbərliyi, YAP rayon təşkilatının fəalları, hüquq-mühafizə orqanlarının əməkdaşları, hərbçilər, əmək kollektivləri, ziyalılar, ağsaqqallar, veteranlar, gənclər, rayon ictimaiyyətinin nümayəndələri iştirak ediblər.
AZƏRTAC xəbər verir ki, Ağdam Dövlət Dram Teatrında keçirilən tədbirdə çıxış edənlər ulu öndər Heydər Əliyevin həyat və fəaliyyətinin müəyyən məqamlarından bəhs edib, dahi rəhbərin xilaskarlıq missiyasından, Azərbaycanın müstəqilliyinin bərpası və möhkəmləndirilməsindəki xidmətlərindən danışıblar. Bildirilib ki, Azərbaycan tarixinin yetişdirdiyi ən parlaq simalardan biri, türk dünyasının qüdrətli şəxsiyyətlərindən olan ulu öndər Heydər Əliyevin həyatı və siyasi fəaliyyəti çoxəsrlik dövlətçilik tariximizə qızıl hərflərlə yazılıb.
Ulu Öndərin doğum günü münasibətilə rayon ərazisində iməcilik keçirilib. Abadlıq-təmizlik işləri aparılıb, ağac və gül kolları əkilib.