HEYDƏR PARKINDA GÖRÜŞ
Dövlətimizin başçısı görüşdə çıxış etdi.
AZƏRBAYCAN PREZİDENTİ İLHAM ƏLİYEVİN ÇIXIŞI
- Əziz qazaxlılar!
Sizi ürəkdən salamlayıram. Mən sizi Milli Qurtuluş günü münasibətilə ürəkdən təbrik edirəm. On bir il bundan əvvəl xalqımızın ümummilli lideri Heydər Əliyev hakimiyyətə qayıtdı. Məhz onun hakimiyyətə qayıdışından sonra Azərbaycanda müharibəyə, qardaş qarşıdurmasına son qoyuldu. Ölkədə sülh, əmin-amanlıq yarandı, böyük işlər görüldü, iqtisadiyyat inkişaf etdi. Bu son 10-11 il ərzində ölkəmiz çox sürətlə inkişaf etməyə başlamışdır.
Siz bilirsiniz ki, bu yaxınlarda qəbul etdiyimiz regionların sosial-iqtisadi inkişafına dair Dövlət Proqramı artıq icra olunur, həyata keçirilir. Bu proqram çərçivəsində bu bölgədə, Qazax rayonunda da böyük işlər görüləcəkdir. Yeni iş yerləri açılacaqdır. Bilirsiniz ki, mənim siyasətimin əsas istiqamətlərindən biri də odur ki, bütün rayonlarda yeni iş yerləri açılsın, yeni istehsal sahələri yaransın, camaat, insanlarımız daha da yaxşı yaşasınlar. Mən çox şadam ki, bu istiqamətdə işlər görülür.Sizə onu da bəyan etmək istəyirəm ki, Azərbaycan Milli Olimpiya Komitəsi Qazaxda müasir Olimpiya İdman Kompleksinin tikilməsinə başlayacaqdır. Tikinti işlərinə bu yaxınlarda başlanacaqdır. Əminəm ki, burada gözəl, müasir idman kompleksi tikiləcək və siz də bundan istifadə edəcəksiniz.
Qazax Azərbaycanın gözəl guşələrindən biridir. Burada çox zəhmətkeş, vətənpərvər insanlar yaşayır. Siz sərhəddə yaşayırsınız. Bilirsiniz ki, Ermənistan-Azərbaycan, Dağlıq Qarabağ münaqişəsi Azərbaycanın ən ağrılı məsələsidir, Azərbaycan üçün həll olunmalı ən mühüm problemdir. Biz çalışırıq bunu həll edək. Amma, eyni zamanda, ordumuzu da gücləndiririk. Orduya lazımi kömək, dəstək göstəririk. Azərbaycanın iqtisadi potensialı gücləndikcə, ordumuz da güclənəcəkdir. Sizə deyə bilərəm ki, bu gün ordumuz qarşıda duran bütün vəzifələri həll etməyə qadirdir.
Mən bu gün Gürcüstandan qayıdıram. Gürcüstana çox səmərəli səfərim olub, gözəl danışıqlarım olubdur. Eyni zamanda, azərbaycanlıların məskunlaşdığı Borçalıda da yerli camaatla görüşüm olubdur. Mən oraya Gürcüstanın Prezidenti ilə birlikdə getmişdim. Əminəm ki, oradakı soydaşlarımız bundan sonra daha da yaxşı yaşayacaqlar. Onların problemləri öz həllini daha sürətlə tapacaqdır.
Azərbaycan inkişaf dövrünü yaşayır. Azərbaycanın hər bir yeri, hər bir rayonu, hər bir bölgəsi inkişaf etməlidir. Əminəm ki, növbəti beş il ərzində qarşımızda duran bütün vəzifələri yerinə yetirəcəyik. Mən verdiyim bütün vədlərə sadiqəm. Heç şübhə etmirəm ki, nəzərdə tutulmuş bütün məsələlər öz həllini tapacaqdır.
Mən seçkiqabağı çıxışlarımın birində bildirmişdim, - əfsuslar olsun ki, istədiyim bütün yerlərdə ola bilməmişdim, vaxt imkan vermirdi, - söz vermişdim ki, ola bilmədiyim rayonlara, şəhərlərə seçkilərdən sonra gələcəyəm. Mən bu sözümə sadiqəm və bu gün sizinlə görüşə gəlmişəm. Bu fürsətdən istifadə edib bütün seçicilərə, Heydər Əliyev siyasətinə səs verdiyinizə görə sizə öz dərin minnətdarlığımı bildirirəm.
Azərbaycanda Heydər Əliyev siyasəti yaşayır. Bu Qurtuluş günü Azərbaycanın inkişaf dövrünün başlanğıcı idi. 11 il bundan əvvəl Azərbaycan yol ayrıcında idi. Hansı yollarla inkişaf edəcəkdi, qarşımıza hansı məsələlər çıxacaqdı. Heç kim onu bilə bilməzdi. Amma baxın, 10-11 ildən sonra Azərbaycanda dünyanın ən böyük layihəsi olan Bakı-Tbilisi-Ceyhan neft kəməri inşa edilir. Qaz kəməri çəkiləcəkdir. Bütün bu layihələr Azərbaycana xoşbəxt gələcək, firavan həyat gətirəcəkdir. Azərbaycanın Prezidenti kimi mən çalışacağam ki, hər bir vətəndaş, hər bir şəxs bu böyük layihələrdən, Azərbaycanda gedən inkişafdan bəhrələnsin. Bu, mənim vəzifəmdir, mənim borcumdur. Mən də bu vəzifəni ləyaqətlə yerinə yetirəcəyəm.
Sizi bir daha ürəkdən salamlayıram. Buraya, bu görüşə gəldiyinizə görə sizə öz dərin minnətdarlığımı bildirirəm. Sizi öpürəm, qucaqlayıram, bağrıma basıram.
Yaşasın qazaxlılar!
X X X
Azərbaycan Prezidenti İlham Əliyev sonra Qazax şəhər stadionuna gəldi, idmançıların nümunəvi çıxışlarına baxdı. Pəhləvan İsrafil Məmmədovun hünəri xüsusilə maraq doğurdu. Dövlətimizin başçısı Azərbaycan çempionatının yüksək liqasına vəsiqə qazanmış “Göyəzən” futbol komandasının üzvləri ilə də görüşdü, idmançılarla xatirə şəkli çəkdirdi. 11 metrlik cərimə zərbəsini dəqiq yerinə yetirməsi isə stadiona toplaşanların hərarətli alqışlarına səbəb oldu.
X X X
Respublikamızın rəhbəri “Azərxalça” İstehsalat Birliyinin Qazax xalça sexi ilə də yaxından tanış oldu.
Birliyin baş direktoru, xalq rəssamı Kamil Əliyev Azərbaycan Prezidentinə sexin fəaliyyəti barədə məlumat verdi, hazırda 60 nəfərin çalışdığı bu istehsal sahəsinin gələcəkdə genişləndiriləcəyini bildirdi. O, İçərişəhərdəki xalça evinin yenidənqurulmasının və burada Azərbaycan xalçaçılıq məktəbinin əsaslı şəkildə təbliği üçün lazımi şəraitin yaradılmasının vacibliyini də söylədi.
Prezident İlham Əliyev bununla bağlı konkret tapşırıqlar verdi.
Dövlətimizin başçısına xatirə olaraq gözəl çeşnili nəfis Qazax xalçası hədiyyə edildi.
Bölmənin digər xəbərləri
