HİTLER 1964-CÜ İLƏDƏK SAĞ OLUB?
“Hitler Argentinada” kitabında Basti ölkənin müxtəlif bölgələrində guya fürerlə görüşmüş şahidlərə və ABŞ Federal Təhqiqat Bürosunun (FTB) bu ehtimalı təsdiqləyən məxfi sənədlərinə istinad edir.
Müəllifin məlumatına görə, Hitler və onu müşayiət etmiş 7 şəxs Almaniyanın sualtı qayığı ilə 1945-ci ilin iyul və avqust ayları arasında Argentinaya gələrək, ölkənin cənubunda Rio-Neqro əyalətindəki Kaleta-de-los-Loros buxtasına çıxmışlar. Qayığı daha iki sualtı gəmi müşayiət etmişdir. “Sərnişinlər” sahilə çıxdıqdan sonra hər üç gəmi batırılmışdır.
Basti yazır: “Biz xüsusi cihazların köməyi ilə aşkarladıq ki, Pataqoniya sahillərinin bu rayonunda 30 metr dərinlikdə qumun və lilin altında üç alman sualtı qayığı var. Onların batırılması Hərbi Dəniz Qüvvələrinin və Müdafiə Nazirliyinin arxivlərindən heç birində göstərilmir. Axı, sonuncu dünya müharibəsi zamanı Argentina Almaniya donanması ilə mübarizə aparmağa heç cəhd də etməmişdir. Əksinə, bu tapıntı bir daha təsdiqləyir ki, Almaniyanın sualtı gəmiləri nəinki Argentinanın su ərazilərinə daxil olmuş, həm də Pataqoniya sahillərində dəfələrlə lövbər salmışdır”.
Tədqiqatçının fikrincə, Hitler və Yeva Braun nasistlərin başçıları Martin Borman, Yozef Mengele və Adolf Eyxman tərəfindən Kordoba, Buenos-Ayres, Mendosa və La Rioxa əyalətlərində əvvəllər salınmış marşrutla səyahətə çıxırlarmış. Məsələn, onlar Argentina diktatoru Xuan Peronun etibarlı şəxslərindən biri olan sahibkar Xorxe Antonionun “La Anqostura” malikanəsində xeyli qalmışlar.
Bastinin fikrincə, yeni kitabının səhifələrində gətirdiyi çoxsaylı şəhadətlər, oxucunu inandırmalıdır ki, Hitleri və Yeva Braunu məhz həmin marşrutla aparır və əsərdə xatırlanan yerlərdə gizlədirdilər.
Müəllif yazır: “Faşist Almaniyasının Cənubi Amerikada əsas maliyyə agentləri olmuş Valter və İda Eykxornlar Kordoba əyalətinin La Falda kəndində çoxdan yaşayırdılar. Katalina Qamero adlı qulluqçu Eykxornların evində uzun illər işləmişdir. O, indi də sağdır, yaddaşı möhkəm və ağlı başındadır. Katalina mənə Eykxornlara məxsus olan kiçik mehmanxanada 1949-cu ildə Hitlerə necə qulluq etdiyini söyləmişdir. Onlar füreri “Əmioğlu” adlandırırdılar. Hitler mehmanxanada bir neçə gün qaldıqdan sonra Eykxonların Pan-de-Asukar təpəsində tikdirdikləri yeni evə köçdü. Bundan başqa, Eykxornlar ilə “Əmioğlu” arasında o illərin məktubları və onların birlikdə çəkdirdikləri fotoşəkillər də qalmışdır”.
Kitabda Eykxornların əvəzçiliklə FTB-nin agenti işləmiş bağbanının gizli məlumatlarına da yer verilmişdir. Bağban bildirirdi ki, 1945-ci ilin mayından sonra Eykxornlar Hitleri qəbul etmək üçün intensiv hazırlığa başlamışdılar.
Bastinin sözlərinə görə, Hitlerin qaçqın Xorvatiya diktatoru Ante Paveliçlə Buenos-Ayres yaxınlığında yerləşən Mar-del-Platada görüşdüyünə dair təkzibedilməz sübutlar da var.
Qulluqçu Katalina Qamero deyir ki, “Əmioğlu” ər-arvad Eykxornla 1964-cü ilədək zəngləşirdilər. Varlıların evlərində qoyulmuş qaydaya əsasən, onlar telefona nadir hallarda yaxınlaşardılar – dəstəyi Katalina götürürdü və o, “Əmioğlu”nun səsini dərhal tanıyırdı.
Tədqiqatçının ehtimalına görə, ötən əsrin 60-ci illərinin ortalarında Hitler qonşu Paraqvaya getmişdir. Burada o, Üçüncü reyxin başçısına və nasistlərin “yeni qayda-qanun”una pərəstiş edən diktator Alfredo Stressnerin himayəsi altında yaşamışdır.
Bölmənin digər xəbərləri
