RƏSMİ XRONİKA
İCTİMAİYYƏTİN NÜMAYƏNDƏLƏRİ İLƏ GÖRÜŞ
Nəbiağalı qəsəbə orta məktəbinin müəllimi QƏRİB MƏMMƏDOV Prezident İlham Əliyevi rayona gəlişi münasibətilə salamlayaraq dedi:
- Cənab Prezident, Samux rayonuna “Xoş gəlmisiniz!” Samux camaatının Sizə böyük inamı var! Biz inanırıq ki, Siz bütün məsələləri - həm siyasi, həm iqtisadi, həm də sosial məsələləri həll edəcəksiniz. Allah qoysa, o gün olsun ki, biz Qarabağı da azad edək, Sizinlə bir yerdə qələbəni bayram edək. Sizə daha böyük uğurlar arzulayıram. Bütün Samux camaatının, ictimaiyyətinin xoş arzularını Sizə çatdırıram.
Mehriban xanım, siz də “Xoş gəlmisiniz!” İcazə verin, sizi qarşıdan gələn 8 Mart qadınlar günü münasibətilə ağsaqqal müəllim kimi ürəkdən təbrik edim.
İLHAM ƏLİYEV: Sağ olun, mən də sizi ürəkdən salamlayırım. Bu gün buraya gəlmişəm ki, görüm işlər necə gedir, uğurlar necədir, hansı məsələlər həll olunmalıdır. Bütövlükdə, Azərbaycanın bütün bölgələrində işlər yaxşı gedir. O cümlədən də Samux rayonunda. Mənə məlumat verildi ki, burada işıq problemi həll olunubdur. Təbii qazın verilməsi məsələsi həll edilir. Yeni kəmər çəkilibdir. İş yerləri açılır, yeni müəssisələr, zavodlar, fabriklər - bütün bunlar həm rayonu, həm də ki, Azərbaycanı inkişaf etdirir. Bizim regionlarımızda çox böyük potensial, böyük imkanlar var. Biz gərək onlardan maksimum dərəcədə faydalanaq, səmərəli şəkildə istifadə edək. Elə edək ki, insanların həyat səviyyəsi günü-gündən yaxşılaşsın. Samuxda da işlər yaxşı gedir və insanları narahat edən məsələlər gələcəkdə öz həllini tapacaqdır. İndi demək olar ki, ölkəmizdə elektrik enerjisi problemi həll edilib, qazın verilməsi məsələsi həll olunur. Bu vaxta qədər qazlaşdırılmayan rayonlara qaz xətləri çəkilir.
İndi qarşımızda duran əsas vəzifə və məsələ əhalini içməli su ilə təmin etməkdir. Bu problem, demək olar ki, bütün rayonlarda var. O cümlədən Bakıda da var. Bakının tələbatını ödəmək üçün böyük boru kəməri çəkilir. Rayonlarda isə proqram hazırlanır və yəqin ki, yaxın zamanlarda lazımi göstərişlər veriləcəkdir. Biz içməli su, kanalizasiya və meliorasiya məsələlərini həll etsək, demək olar ki, əsas infrastruktur məsələləri öz həllini tapacaqdır. Yollar, elektrik stansiyaları, qaz xətləri - bütün bunlar insanların normal yaşaması üçündür. İş yerləri açılır. Mən bilirəm ki, burada böyük istehsal sahələri yaradılıb və orada işləyən insanlar yaxşı maaş alırlar. İşsizlik, demək olar ki, aradan qaldırılır. Mən bilirəm, işləmək istəyən iş tapar. İndi nə qədər imkanlar var, nə qədər inşaat işləri gedir, nə qədər müəssisələr, fabriklər yaradılıbdır. 600 mindən çox yeni iş yeri yaradılıb və növbəti illərdə işsizlik tamamilə aradan qaldırılacaqdır. İstisna olunmur ki, gələcəkdə xaricdən Azərbaycana işləmək üçün insanlar gələcəklər. Artıq bunun ilkin əlamətlərini biz görürük və artıq var. Mən bu məqsədlə bir müddət bundan əvvəl miqrasiya xidməti yaratdım.
Azərbaycanın qarşısında çox gözəl perspektivlər, imkanlar var, ölkəmiz güclənir, möhkəmlənir. Gərək bütün rayonlar, kəndlər inkişaf etsin. Regionların sosial-iqtisadi inkişafına dair növbəti Dövlət proqramı hər bir kəndin problemini həll edəcəkdir. Yerli icra orqanları da bunu bilir, o proqramda hər bir məsələ öz həllini tapacaq, insanları narahat edən məsələ qalmayacaqdır. Bizim imkanımız var, gücümüz, maliyyə resurslarımız var, büdcəmiz ildən-ilə artır.
Sizə də mən öz səmimi duyğularımı ifadə etmək istəyirəm və ilk dəfədir ki, Samux rayonuna gəlmişəm. İstəyirəm ki, burada hər şey yaxşı olsun, yaxşı yaşayasınız.
QƏRİB MƏMMƏDOV: Çox sağ olun, Siz bizim Prezidentimizsiniz və əbədi Prezidentimiz olacaqsınız. Deputatımız da yaxşı işlər görür.
İLHAM ƏLİYEV: Valeh Ələsgərov yaxşı işləyir. Həm deputatlar, həm də icra nümayəndələri bir komanda kimi işləməlidir. Bu, Azərbaycanda var. Həm deputat öz vəzifə borcunu yerinə yetirməlidir, həm icra hakimiyyəti başçısı, həm də Prezident. Biz hamımız ona görə işləyirik ki, xalqa xidmət edək. Bu, əsas məsələdir. Biz xalq üçün işləməliyik və işləyirik. Bu, böyük bir məsuliyyətdir. Hər bir vəzifəli şəxsin məsuliyyəti bundan ibarətdir. O adamı ki, onu xalq seçib və yaxud xalq tərəfindən seçilmiş Prezident onu təyin edib, o, xalqa xidmət etməlidir. Deputatı siz seçmisiniz, inam göstərmisiniz və mən bilirəm ki, o, rayonda böyük işlər görübdür. İcra hakimiyyətinin başçısını mən təyin etmişəm. Siz mənə bu səlahiyyəti vermisiniz və ondan tələb edirəm ki, yaxşı işləsin. Mənim bildiyimə görə, yaxşı işləyir. İnsanların problemləri ilə məşğul olmalıdır. Ona görə o təyin edilibdir. Bilməlidir ki, hansı problem var, harada çatışmayan məsələ var, ədalətsizlik var, nəyi etmək olar, nəyi yerli orqanlar edə bilər, nəyi dövlət etməlidir. Belə olsa, işlər yaxşı gedəcəkdir. Çünki bizim bütün sahələri əhatə edən proqramlarımız var. Regionların sosial-iqtisadi inkişafı Dövlət proqramı var, sənayeləşmə proqramı var. Gəncədə mən dünya miqyaslı zavodların təməlini qoydum. Onlar 2-3 ildən sonra işə düşəcək və minlərlə insan işləyəcək və 100 milyonlarla dollarlıq məhsul ixrac olunacaqdır. Təhsil proqramımız var, bütün rayonlarda, o cümlədən Samux rayonunda məktəblər tikilir. Bəli, həm dövlət xətti ilə, həm də Heydər Əliyev Fondunun dəstəyi ilə. Heydər Əliyev Fondu bu təşəbbüsü qaldırmışdır. Bir müddət bundan əvvəl biz də bu təşəbbüsə qoşulduq və həm indi dövlət xətti ilə, həm Heydər Əliyev Fondunun xətti ilə işlər görülür.
Burada idmançıları görürəm. İdman sahəsində proqram var, bütün bölgələrdə müasir idman kompleksləri tikilir. Səhiyyə sahəsində proqram var, xəstəxanalar tikilir. Ekoloji vəziyyəti yaxşılaşdırmaq üçün böyük proqram qəbul etmişik. Nəqliyyat proqramı var. Bakıdan Gürcüstan, İran və Rusiya sərhədinə qədər yeni avtomobil yolları çəkilir. Eyni zamanda şəhərlərarası yollar çəkilir. Hər bir sahədə bu proqramlar var və onların maddi əsası var. Elə deyil ki, gözəl ideya kimi bəyan etdik və yaxud da şüar kimi qaldı kağızda. Yox. Nəyi yazmışıqsa, onu da edirik. Bunun üçün, əlbəttə ki, dövlət orqanları çalışmalıdır, yerli icra orqanları, fəallar, deputatlar, ağsaqqallar və cavanlar çalışmalıdırlar. Bax, bu yolla ölkəmiz irəli getməlidir və belə də gedəcəkdir.
Bu gün Azərbaycan bölgədə ən qabaqcıl ölkədir. Bunu biz də bilirik, beynəlxalq qurumlar və başqa ölkələr də etiraf edirlər. Nəyin hesabına buna nail olmuşuq? Öz gücümüzün hesabına. Kim bizə kömək edir? Başqa keçmiş sovet respublikalarından fərqli olaraq, müstəqilliyimizin ilk illərindən biz heç kimdən ciddi yardım almamışıq. Bizim qonşularımıza daha çox yardım etmişlər, nəinki bizə. İndi də belədir. Bunun səbəbləri var. İstəmirəm bu barədə danışım, hamı bilir nə üçün. Amma bizə heç lazım da deyil. Lazım gələndə, biz özümüz kiməsə kömək edə bilərik və edirik. Biz ancaq öz gücümüzə, Azərbaycan xalqının iradəsinə, dövlət siyasətinə, müstəqilliyimizə və müstəqillik hüquqlarımıza istinad etməliyik. Biz müstəqil xalq kimi, dövlət kimi inkişaf edirik və dünyada Azərbaycan kimi inkişaf edən ikinci ölkə yoxdur. Bir il yox, dörd il ərzində! Dörd ildə iqtisadiyyat iki dəfə artıb. Heç bir yerdə bu yoxdur və tarixdə də olmayıbdır. Bu, reallıqdır. İqtisadi islahatlar, siyasi islahatlar, sosial məsələlərin həlli artıq elə həddə çatıbdır ki, indi onlar görülübdür. Siyasəti başlayanda, hansısa iqtisadi proqramı başlayanda, bir müddət lazımdır ki, o işlər görülsün. Bu gün şəhərlərin abadlaşmasında, qaz xətlərinin çəkilməsində, məktəblərin tikintisində bunu görürük. Elə etməliyik ki, bu yüksək sürət azalmasın, bu sürətlə irəliyə gedək və insanları narahat edən bütün problemləri həll edək. Bu işdə hamımız birlikdə olmalıyıq, bir nöqtəyə vurmalıyıq və belə də olacaqdır.
VİLYAM HACIYEV (rayon icra hakimiyyətinin başçısı):
- Cənab Prezident, çox sağ olun! Öz minnətdarlığımızı bildiririk. İcazə verin, samuxlular sizinlə xatirə şəkli çəkdirsinlər.
Dövlətimizin başçısı rayon ictimaiyyətinin nümayəndələri ilə xatirə şəkli çəkdirdi.