“İKİ PREZİDENT ARASINDA”
Gürcüstan Prezidenti İcra aparatının regional siyasət və idarəetmə xidməti rəisinin müavini İmir Məmmədlinin və Tbilisidəki Azərbaycan mədəniyyəti mərkəzinin direktoru Məmməd Gülməmmədovun birgə yazdıgları və “Qulani” nəşriyyatında bu günlərdə çapdan çıxan kitab belə adlanır.
Tbilisi və Rustavi şəhərlərindən, Marneuli, Qardabani, Bolnisi, Msxeta və Laqodexidən olan ziyalıların nümayəndələrinin iştirakı ilə keçirilən təqdimat mərasimində “Gürcüstan” qəzeti baş redaktorunun müavini İslam Əliyev, professor Valeh Hacıyev, Kvemo Kartli - Boçalı bölgəsi qubernatorunun birinci müavini Əli Yüzbaşov və başqaları çıxış edərək, gürcü və Azərbaycan xalqları arasında dostluğun möhkəmlənməsində xidmətlərinə görə Prezident Eduard Şevardnadzenin Fərmanı ilə “Şərəf” ordeninə layiq görülmüş İmir Məmmədlinin və istedadlı şair, dramaturq, tərcüməçi, Gürcüstanın əməkdar jurnalisti Məmməd Gülməmmədovun birgə qələmə aldıqları “İki prezident arasında” kitabını yüksək dəyərləndirdilər.
Bildirildi ki, “İki prezident arasında” kitabı ilk növbədə janr yeniliyi ilə fərqlənir. Prezident Heydər Əliyevin və Prezident Eduard Şevardnadzenin bir çox rəsmi və dostluq görüşlərində həm də tərcüməçi kimi iştirak etmiş İmir Məmmədli jurnalist Gülməmməd Məmmədovun suallarına cavab verərək, Azərbaycan və Çürcüstan dövlətlərinin başçıları haqqında oxuculara maraqlı faktlar təqdim etmişdir.
Şahismayıl Məmmədov
AZƏRTAC-ın xüsusi müxbiri
Tbilisi
Bölmənin digər xəbərləri
