Şamaxı, 17 iyul (AZƏRTAC). Şamaxıda cari ilin 6 ayında rayonun sosial-iqtisadi inkişafının yekunlarına və qarşıda duran vəzifələrə həsr edilmiş yığıncaq keçirilib.

AZƏRTAC xəbər verir ki, hesabat məruzəsində və çıxışlarda 6 ayda rayonda görülmüş işlər ətraflı təhlil olunub. Bildirilib ki, ilin birinci yarısında rayonda ümumi məhsul buraxılışının həcmi 78 milyon manata çatıb. Bu, ötən ilin müvafiq dövründəkindən 2,1 milyon manat və ya 2,8 faiz çoxdur. Bu müddətdə 319 daimi iş yeri açılıb.

Qeyd edilib ki, rayon iqtisadiyyatının aparıcı sahəsi olan kənd təsərrüfatında işlər qənaətbəxşdir. Yarım ildə aqrar sektorda 17,1 milyon manatlıq məhsul istehsal olunub.

Diqqətə çatdırılıb ki, ötən əsrin 70-80-ci illərində Azərbaycanın ən böyük üzümçülük rayonlarından olan Şamaxıda hazırda bu sahənin inkişafı xüsusi diqqət mərkəzindədir. 2012-2020-ci illərdə Azərbaycan Respublikasında üzümçülüyün inkişafına dair Dövlət Proqramı qəbul olunduqdan sonra bu istiqamətdə geniş işlərə başlanılıb. Fermerlər tərəfindən son üç ayda 10 hektarda yeni plantasiya salınıb, rayon üzrə bütövlükdə üzümlüklərin sahəsi 1627,5 hektara çatdırılıb. Cari mövsümdə üzüm plantasiyalarından yüksək məhsul gözlənilir.

Aqrar sektorda aparıcı sahələrdən olan heyvandarlıqda da yarım ilin nəticələri diqqətəlayiqdir. İribuynuzlu mal-qaranın və davarların baş sayı, habelə məhsul istehsalı ötən ilin müvafiq dövrü ilə müqayisədə xeyli artıb. Arı ailələrinin sayı 4853-ə çatdırılıb.

Yığıncaqda tikinti-quraşdırma və abadlıq işlərindən, əhalinin su, təbii qaz və elektrik enerjisi ilə təchiz olunması istiqamətində görülən işlərdən də ətraflı danışılıb.

Bildirilib ki, təkcə ilin ikinci rübündə şəhərdə 25 kilometr kanalizasiya, 33 kilometr su xətti çəkilib. Rayonun Muğanlı və Saqiyan kəndlərində 2012-ci ilin martında torpaq sürüşməsi nəticəsində evləri yararsız vəziyyətə düşmüş sakinlər üçün Fövqəladə Hallar Nazirliyi tərəfindən tikilmiş 63 ədəd yeni fərdi ev istifadəyə verilib. Şəhərdəki 1 nömrəli körpələr evi - uşaq bağçası üçün yeni binanın inşasında tamamlanma işləri aparılır. Mədrəsə qəsəbə tam orta məktəbi üçün 380 şagird yerlik yeni binanın tikintisinə başlanılıb.

Eyni zamanda, Şamaxı şəhərinin yeni yaşayış massivlərinin, Saqiyan və Şərədil kəndlərinin qazlaşdırılması işləri həyata keçirilir.

Tədbirdə rayonda turizmin inkişafı istiqamətində görülən işlərdən də söhbət açılıb. Şərədil kəndi yaxınlığında müasir standartlara cavab verən beşulduzlu “Şamaxı Palace Platinum By Rixos” otelinin rəsmi açılış mərasimində Azərbaycan Prezidenti İlham Əliyevin iştirakı minnətdarlıq hiss ilə qeyd olunub.

Toplantıda qarşıda duran vəzifələrdən də ətraflı danışılıb. Əsas diqqət iyulun 10-da Prezident İlham Əliyevin sədrliyi ilə Nazirlər Kabinetinin 2014-cü ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunmuş iclasında dövlətimizin başçısının dərin məzmunlu nitqində irəli sürülən məsələlərə yönəldilib.