QAN YADDAŞI
İordaniyalı akademik: Xocalı soyqırımını törədənlərə qarşı İslam ölkələri və bütün dünyada sanksiyalar tətbiq edilməlidir
Qahirə, 22 fevral, AZƏRTAC
Ərəb ölkələrində Azərbaycanın ədalətli mövqeyini təbliğ edən, Xocalı soyqırımı həqiqətlərini tanıdan iordaniyalı akademik Mərvan Suda Xocalı soyqırımının 30-cu ildönümü ərəfəsində fikirlərini AZƏRTAC-ın xüsusi müxbiri ilə bölüşüb.
Akademik bildirib: “Beynəlxalq Cinayət Məhkəməsi hesab edir ki, soyqırımı bir və ya bir neçə şəxsin müəyyən bir milli, etnik, irqi və ya dini qrupa mənsub olması zəminində qətlə yetirilməsidir və bu cinayəti törədən şəxslər həmin milli, etnik, irqi və ya dini qrupu məhv etmək niyyətindədir. Bu cür əməllər silahlı münaqişə və ya müharibə şəraitində mülki əhaliyə qarşı törədildiyində, beynəlxalq hüquq normalarında bəşəriyyətə qarşı cinayət hesab olunur. Bütün bu və digər maddələr Beynəlxalq Cinayət Məhkəməsinin Roma Əsasnaməsinin iştirakçısı olan Dövlətlər Assambleyasının 2002-ci il sentyabrın 3-dən 10-dək Nyu-Yorkda keçirilmiş birinci sessiyasında təsdiq olunub və beynəlxalq səviyyədə qəbul edilib. Buna görə də Ermənistan və konkret olaraq Xocalı soyqırımını törədənlər məhkəmə qarşısında cavab verməlidir”.
Ötən əsrin 90-cı illərində erməni işğalçılarının Qarabağı qəsb etmək, həmçinin oranın zəngin sərvətlərini talamaq məqsədilə öz havadarlarının dəstəyi ilə hərəkətə keçdiklərini vurğulayan akademik, əslində, heç vaxt öz dövləti olmayan ermənilər tarixi saxtalaşdırmaqla nəinki Qarabağın, qonşu dövlətlərin də ərazilərinin onlara məxsus olması kimi sərsəm iddialar irəli sürməyə başladılar. Həmin illərdə nəzarətsizlik və SSRİ-də hökm sürən xaosdan istifadə edən Ermənistan etnik təmizləmə siyasətinə baş vurdu. Onlar Azərbaycan ərazilərində əhalini qorxutmaq məqsədilə kütləvi qırğınlar törətdilər. Bu əməllər beynəlxalq terrorizmin ən iyrənc formaları idi.
Bu hadisələri izləyən bir tədqiqatçı olaraq Xocalıda və digər ərazilərdə törədilmiş ağır cinayətlərin təqsirkarlarının cəzalandılmamasınən onda suallar doğurduğunu deyən Mərvan Suda diqqətə çatdırıb ki, onlar Beynəlxalq Cinayət Məhkəməsində mühakimə olunmalıdır. “Xocalı qırğınından 28 il sonra başlayan İkinci Qarabağ müharibəsində də erməni silahlı qüvvələri mülki əhaliyə qarşı ağır cinayətlər törədiblər. Digər tərəfdən, işğaldan azad edilmiş ərazilərdə Ermənistanın talan və qarət əməlləri də böyük cinayət sayılır. Bir sözlə, ermənilər son 30 ildə saysız ağır cinayətlər törədiblər”, - deyə akademik əlavə edib.
Xocalı həqiqətlərinin bütün dünyada tanıdılması istiqamətində Heydər Əliyev Fondu və İslam Əməkdaşlıq Təşkilatı Gənclər Forumunun fəaliyyətini xüsusi qeyd edən M.Suda bildirib ki, “Xocalıya ədalət!” kampaniyası bu məsələdə beynəlxalq ictimaiyyətin Azərbaycanla həmrəyliyini möhkəmləndirən başlıca amil oldu.
Ermənistanın törətdiyi bu soyqırımının təkcə İslam deyil, bütün dinlər qarşısında ağır günah olduğunu diqqətə çatdıran akademik deyib ki, körpələrin, ahıl insanların, qadınların vəhşicəsinə qətlə yetirilməsini bütün səmavi dinlər cəhənnəm əzabı ilə lənətləyir.
İordaniyalı akademik vurğulayıb ki, Xocalıda törətdiyi soyqırımı etiraf etməsi üçün beynəlxalq ictimaiyyət, o cümlədən İslam ölkələri Ermənistana siyasi və iqtisadi təzyiqlər göstərməlidir. Ermənistan rəhbərliyi Xocalı soyqırımı və mülki əhaliyə qarşı digər cinayətlərin qurbanlarının ailələlərinə beynəlxalq səviyyədə təzminat ödəməyə məcbur edilməlidir. Bundan başqa, İslam ölkələrində hər il fevralın 26-da Anım Günü elan etmək, məktəblərdə dərs proqramlarına Xocalı soyqırımı ilə bağlı məşğələlər, həmçinin dərsliklərə bu faciə haqqında mətnlər salmaq olar. Digər tərəfdən, Xocalı soyqırımı ilə bağlı müsəlman və xristian din xadimlərinin birgə bəyanatının da verilməsi məqsədəuyğun olar. Çünki bu ağır cinayət ermənilərin İsa Məsihin təliminə də xəyanət etdiklərini, onların saxta xristian olduqlarını da göstərmiş oldu.
“Hesab edirəm ki, bəzi Avropa ölkələrində Holokostla bağlı qərarlarda olduğu kimi, Xocalı soyqırımını da inkar edənlər müvafiq şəkildə cəzalandırılmalıdır. Mən, həmçinin İslam dövlətlərinin paytaxtlarında Xocalı abidəsinin ucaldılmasını, ərəb dilində yeni kitablarını nəşr edilməsini də təklif edirəm”, -deyən Mərvan Suda əlavə edib ki, Ermənistanın siyasi elitasında təmsil olunan və Xocalı qırğınında əli olmuş şəxslərin məhkəmə qarşısına çıxarılması, habelə onların barəsində beynəlxalq miqyasda hərəkət məhdudiyyəti və bank hesablarının dondurulması tədbirləri də görülməlidir. Bu şəxslər xüsusilə İslam ölkələrinə buraxılmamalı, onların adları İƏT-in arzuolunmaz şəxslər siyahısına salınmalıdır.
Akademik sonda Xocalı soyqırımı qurbanlarının xatirəsini ehtiramla anıb, onlara Uca Allahdan rəhmət diləyib, bu ağır cinayətin təqsirkarlarının tezliklə cəzalandırılmasını arzulayıb.