İRAN PREZİDENTİNİN BƏYANATI
İran Prezidenti Məhəmməd Xatəmi bəyan etmişdir ki, ölkəyə vəd olunmuş islahatların həyata keçirilmədiyini görsə, vəzifəsindən gedəcəkdir.
Xatəmi ötən ilin iyununda rəqiblərini xeyli geridə qoyaraq prezident seçkilərində ikinci dəfə qalib gəlmişdir. Lakin onun qarşıya qoyduğu məqsəd - ölkədə qanunun aliliyinə əsaslanan daha açıq cəmiyyət yaradılması məqsədi mühafizəkar dairələrin güclü müqavimətinə görə yerinə yetirilməmiş qalmışdır. İTAR-TASS-ın verdiyi xəbərə görə, müşahidəçilərin fikrincə, Xatəminin istefası ölkədə kütləvi iğtişaşlar yaranmasına gətirib çıxara bilər.
Prezidentin tənqidçiləri bildirirlər ki, seçkilərdə inamlı qələbəyə və parlamentdəki tərəfdaşlarının böyük əksəriyyətinin dəstəyinə baxmayaraq, islahatlar sahəsində ancaq cüzi tərəqqi əldə olunmuşdur.
Xatəmi demişdir: “Vətəndaş hüquqlarına və azadlıqlarına əməl edilməlidir. İranlılar şəxsən mənə deyil, ədalətlilik və azadlıq prinsiplərinin həyata keçirilməsinə səs vermişlər. Cəmiyyətin təhlükəsizliyi ancaq ölkə rəhbərləri üçün təhlükəsizlik demək deyildir. Təhlükəsizlik bütün vətəndaşlara şamil edilməlidir. Bu səylərin uğursuzluğu nəinki dövlət sisteminə, həm də islamın özünə zərbə demək olacaqdır”.
Bölmənin digər xəbərləri
