İRAN TƏKZİB EDİR

27.10.2006 [17:25]
Çap et
A⁺ A^-

AZƏRTAC “Novosti” agentliyinə istinadla xəbər verir ki, İranın Xarici İşlər Nazirliyi Tehranı 1994-cü ildə Buenos-Ayresin yəhudi mərkəzində törədilən partlayışda əli olmaqda təqsirləndirən Argentina prokurorluğunun bəyanatını rədd etmişdir. Xarici siyasət idarəsi bu ittihamları “Argentina cəmiyyətini sionistlərin Livan və Fələstinə təcavüzü və orada dinc vətəndaşları qırması ilə əlaqədar İsrail əleyhinə əhval-ruhiyyədən yayındırmaq üçün apardıqları antiiran təbliğatının bəhrəsi” adlandırmışdır.

İran XİN-in rəsmi nümayəndəsi Məhəmməd Əli Hüseyni bildirmişdir: “İranın özü dəfələrlə müxtəlif terror aktlalrına və onların nəticəsində ağır mənəvi və maddi zərərlərə məruz qalmışdır”.

Xatırladaq ki, oktyabrın 25-də Argentina prokurorluğu İranın sabiq prezidenti Haşimi Rəfsəncani və ölkənin güc qurumlarının keçmiş rəhbərləri sırasından daha yeddi nəfər, habelə “Hizbullah” barəsində beynəlxalq axtarış elan olunmasını tələb etmişdir. Prokurorluğun iddiasına görə, yəhudi mərkəzini partlatmaq qərarını İran rəhbərliyi 1993-cü ildə qəbul etmiş, bunun icrasını isə Livan qruplaşmasının yaraqlılarına tapşırmışdır.

1994-cü ildə Buenos-Ayresdə yəhudi mərkəzində partlayış nəticəsində 85 nəfər həlak olmuş, 200-dək adam xəsarət almışdı.

İRAN TƏKZİB EDİR

MÜƏLLİFLƏ ƏLAQƏ

Bölmənin digər xəbərləri