İRAQ: FİLİPPİNLİLƏR GETDİLƏR...

19.07.2004 [21:02]
Çap et
A⁺ A^-

AZƏRTAC-ın xarici informasiya agentliklərindən aldığı xəbərdə deyilir ki, iyulun 19-da Filippin 51 əsgər və zabitdən ibarət hərbi kontingentinin İraqdan çıxarılmasını başa çatdırmışdır.

Beləliklə, Manila filippinli mülki sürücünü oğurlamış yaraqlıların ultimatumunu yerinə yetirmişdir. Onlar Filippin hökumətindən öz əsgərlərini iyulun 20-dək İraqdan çıxarmağı tələb edir, əks halda, onu öldürməklə hədələyirdilər.

...POLŞA ORDUSUNUN KONTİNGENTİ İSƏ QALIR

AZƏRTAC-ın xəbər verdiyi kimi, Polşanın Baş naziri Marek Belka bazar günü Bağdada gəlmişdir. İyulun 19-da o, iraqlı həmkarı Əyyad Əllavi ilə görüşdə bəyan etmişdir ki, Polşa öz hərbi kontingentini İraqda çoxmillətli qüvvələrin tərkibində yerləşdirməyə dair öhdəliklərinə sadiq qalır.

M.Belka Varşavanın yeni İraq rəhbərliyini dəstəklədiyini təsdiqləmiş və Ə.Əllavini öz ölkəsinə cavab səfərinə dəvət etmişdir. Dəvət qəbul olunmuşdur.

Xatırladaq ki, hazırda İraqda Polşanın 2500 əsgər və zabiti var. Polşa kontingentinin üçüncü növbəsi oraya getməyə hazırlaşır.