CƏMİYYƏT
“İrəli” İctimai Birliyi “Komandanın baza biliklərinin gücləndirilməsi” layihəsinin icrasını başa çatdırıb
Bakı, 16 fevral, AZƏRTAC
“İrəli” İctimai Birliyi gənclərdə komanda ruhunun yüksəldilməsi, problemlərin kollektiv şəkildə həlli və ümumilikdə gənclərin yeni bilik və bacarıqlar əldə etməsi məqsədilə “Komandanın baza biliklərinin gücləndirilməsi” layihəsini həyata keçirib.
İctimai Birlikdən AZƏRTAC-a bildiriblər ki, 40-a yaxın gəncin iştirakı ilə reallaşdırılan layihənin əsas məqsədi Birliyin gənclərlə işləyən fəal üzvlərinin potensialını artırmaqla digər gənclər üçün daha yaxşı imkanlar yaratmaq olub.
Layihənin birinci günündə görüş “İrəli” İctimai Birliyin sədri Şahin Rəhmanlı ilə keçirilib. Görüşdə Birliyin fəaliyyətində aktiv yer alan gənclərlə cari il üçün həyata keçiriləcək layihə və tədbirlərin planı müzakirə edilib. Gənclərin bu fəaliyyətlərdə aktiv rol almalarının, həmyaşıdlarına göstərə biləcəkləri dəstəyin vacibliyindən danışılıb. “İrəli” İctimai Birliyinin sədri bütün bu fəaliyyətlərin icrasında komanda işinin əhəmiyyətindən söhbət açıb.
Növbəti gün Heydər Əliyev adına Müasir Təhsil Kompleksinin direktor müavini, təlimçi Anar Məmmədovun təqdimatında “Komandada peşəkar idarəçilik” mövzusunda “vorkşop” keçirilib. Təlim müddətində komanda daxilində idarəetmə, liderin xarakterik xüsusiyyətləri və Edvard De Bononun “6 düşüncə şlyapası” metodu haqqında ətraflı müzakirələr aparılıb, gənclərə liderlik və komanda quruculuğu haqqında nəzəri və praktiki biliklər ötürülüb.
Gənclər Fondunun maliyyə dəstəyi ilə Lənkəranda həyata keçirilən layihə çərçivəsində, həmçinin “Sağlam Düşüncə” Gənclər Təşkilatının idarə heyətinin üzvü Ramiz Əliyev, Gənclərin İnkişaf və Karyera Mərkəzinin baş direktoru Ramtiq Alızadə ilə görüşlər keçirilib. Görüşlərdə qonaqlar tərəfindən Birliyin əməkdaşları və üzvləri ilə beynəlxalq əlaqələr, faundreyzinq, Avropa Həmrəylik Korpusunun könüllülük proqramı, beynəlxalq layihələrin yazılması və idarə edilməsi, o cümlədən regionlarla iş, insan resurslarının idarə edilməsi, region gənclərinin ehtiyaclarının müəyyənləşdirilməsi və digər mövzular müzakirə edilib.
Layihədə gənclərin asudə vaxtının səmərəli təşkili, eyni zamanda, keçirilən təlimlərin effektivliyinin artırılması məqsədilə Birliyin əməkdaşları Günel Abbaszadə və Raziyə Dadaşzadə tərəfindən müxtəlif oyun və enercayzerlər də həyata keçirilib. Bununla yanaşı, gənclərdə komanda ruhunun gücləndirilməsi və Lənkəranın tarixi-mədəni abidələri, görməli yerləri ilə tanışlıq məqsədilə “Axtar tap” intellektual oyunu keçirilib.
Layihənin icrası müddətində gənclərin şəxsi inkişafı təmin edilib, komanda işində buraxılan səhvlərin həlli istiqamətində addımlar atılması ilə bağlı görüşlər keçirilib. Həmçinin iştirakçılar problem həlletmə, qərar qəbulu, komanda birliyinin əhəmiyyəti haqqında praktiki təcrübə əldə ediblər.