QOÇLAR bu həftə ətalətin cəngindən qurtulmalıdırlar. Həvəsdir, bəsdir. Amma əgər hadisələrə təsir göstərə bilmirsinizsə, ruhdan düşməyin. Sınanılmış məsləhətə qulaq asın və dünyaya münasibətinizi dəyişin. İstənilən halda səyləriniz boşa getməyəcəkdir.

BUĞALAR keçmişin ağır xatirələrindən və təəssüratlarından qurtulmalıdırlar. Başınızı dik tutub alnıaçıq-üzüağ irəli getməlisiniz. İnanın ki, çox gözəl formadasınız və istənilən işin öhdəsindən gəlməyə qadirsiniz. Uzaqdan xəbərlər gözləyin. Bu xəbərlər ürəyinizdə kök salmış, çıxılmaz saydığınız problemlərin həllinə kömək edəcəkdir.

ƏKİZLƏR öz məqsədlərinə çatmaq üçün gərəksiz düşüncələri başlarından çıxarmalıdırlar. Ömrünüzü əhəmiyyətsiz, mənasız məsələlərlə çürütməyin. Çalışın ki, həqiqətən maraqlı olan mətləblərdən agah olasınız. Yarı yolda dayanmaq sizə yaraşmaz. Yolun sonunda sizin də qapıda bahar olacaq, uğur təbəssümünü dodaqlarınızda hiss edəcəksiniz.

XƏRÇƏNGLƏR bizneslərinin perspektivlərini yaxşı-yaxşı düşünmək üçün yaranmış fasilədən istifadə etməlidirlər. Qeyri-rəsmi görüşlər faydalı əlaqələr qurmağa və tərəfdaşlarla səmərəli ideya mübadiləsinə kömək edəcəkdir. İstirahəti unutmayın. Sağlam canda sağlam ruh olduğu kimi, dincəlmiş beyində də qeyri-standart, gözəl-gözəl ideyalar doğulur. Yaradıcı potensialınızı ortaya qoymaq üçün hər cür imkanınız vardır.

ŞİRLƏRİN bu həftə intellektual hücuma başlamaları üçün hazırlıq dövrü olacaqdır. Uzunmüddətli planlar qurmağa çalışmayın. Vəziyyət öz-özünə aydınlaşacaq və siz qədərindən artıq informasiyaya sahib olacaqsınız. Ehtiyac yoxdursa, nə rəhbərliyi, nə də tabeliyinizdəki adamları işgüzar problemlərinizlə narahat etməyin.

QIZLAR son günlər gərgin işlədikdən sonra bir qədər dincələ bilərlər. Qısamüddətli turizm səfərləri əhvalınızı yüksəldib dünyagörüşünüzü artırmağa kömək edəcək, unudulmaz təəssüratlarla yadda qalacaqdır. Ulduzlar dostlarla görüşlərə, təbiətin qoynuna səfərlərə, teatrlara getməyə və digər mədəni tədbirlərə qatılmağa rəvac verir. Gündəlik yeknəsəqlikdən qurtulub daha çox doğma və yaxınlarınızla vaxt keçirməyə, qiraət və digər hobbilərinizə vaxt ayırmağa çalışın. Onsuz da son günlər vaxt qıtlığından şikayətlənirdiniz. İndi bu fürsətdən ürəyinizcə istifadə edin.

TƏRƏZİLƏR bu həftə mövcud imkanlarından səmərəli şəkildə istifadə edə biləcəklər. İçinizdəki şübhələrin və qarşınızdakı əngəllərin planlarınızı pozmağa, ambisiyalarınıza qalib gəlməsinə imkan verməyin. Hadisələrin gedişatına və ətrafdakı insanların münasibətinə məhəl qoymayın. Sadəcə zəngin həyat təcrübənizdən bəhrələnib məqsədə doğru gedin.

ƏQRƏBLƏRİN həyatı heç də pis deyildir. Səma cisimlərinin düzümü göstərir ki, həyatınızı daha da rövnəqləndirməkdə qəbahətli heç nə yoxdur. İstəklərinizi həyata keçirmək üçün nə qədər çox səy göstərsəniz, gözəl imkanlardan bir o qədər bəhrələnə bilərsiniz. Yaradıcı işinizə görə təklif edilən pul mükafatından boyun qaçırmağı ağlınızın ucundan belə keçirməyin.

OXATANLAR böyük xərc və zaman tələb edən layihəni davam etdirmək üçün qəti qərara gəlməlidirlər. Britaniya astroloqları xəbərdarlıq edib bildirirlər ki, əlinizdə-ovcunuzda olanları itirməmək üçün səxavət xurcununun ağzını möhkəm bağlamalısınız. Yaxın günlərdəki xeyirxahlığınızın əvəzini üçqat alacaqsınız. Həmin pulu səmərəli xərcləsəniz, həm canınızı, həm də gözünüzü oxşaya bilərsiniz.

OĞLAQLAR bu həftə üçün rəngarəng hadisələrlə zəngin olacaqdır. Əgər dostlarla şəhər ətrafına gəzintiyə çıxmaq imkanınız varsa, bu fürsəti əldən verməyin. Təbiətin qoynu, təmiz hava, gözəl məclis: yaşamağın gözəl olduğunu anlamaq üçün daha nə lazımdır. Yaxud istirahət günlərini evdə keçirib əsaslı təmizlik işləri ilə məşğul olmalısınız. Necə deyərlər, seçim sizindir.

DOLÇALAR üçün həftə bir göz qırpımı qədər sürətlə ötüb keçəcəkdir. İmkan tapıb hansısa işi başa çatdırmağa macal tapmamısınızsa, qanınızı qaraltmayın. İstirahət günlərini elə istirahətin özünə sərf etsəniz, bayram günlərindən sonra bütün işlərinizi ən yüksək səviyyədə görə biləcəksiniz.

BALIQLARIN həmkarları və müdirləri xəyalən öz bağ evlərində yazın ən gözəl çağlarının ləzzətini çıxarırlar. Odur ki, işdəki kiçik qələtiniz diqqəti cəlb etməyəcəkdir. Lakin istirahət günlərindən sonra ilk işiniz qələtlərinizi düzəltmək olacaqdır, yoxsa başı zövq-səfadan ayılan rəhbərliyin qəzəbi sizi yerlə-yeksan edəcəkdir.