SİYASƏT
İslamabadda Azərbaycanla Pakistan arasında diplomatik münasibətlərin qurulmasının 30-cu ildönümü ilə bağlı seminar keçirilib
Bakı, 8 iyun, AZƏRTAC
Azərbaycanın Pakistandakı səfirliyi bu ölkənin aparıcı beyin mərkəzlərindən biri olan Müslim İnstitutu ilə birgə iki ölkə arasında diplomatik əlaqələrin qurulmasının 30-cu ildönümünə həsr olunan “Azərbaycan və Pakistan münasibətləri - akademik və sosial-mədəni perspektivlər” mövzusunda seminar keçirib.
Səfirlikdən AZƏRTAC-a bildirilib ki, seminarda ölkəmizin Pakistandakı səfiri Xəzər Fərhadov, Milli Məclisin deputatı, Azərbaycan Dillər Universitetinin (ADU) sosial məsələlər üzrə prorektoru Tamam Cəfərova, ADU-nun elm və innovasiya məsələləri üzrə prorektoru professor Novruz Məmmədov, ADU-nun xarici mərkəzlərlə iş bölməsinin müdiri Anar Rəhimov, xarici ölkələrin Pakistandakı səfirləri və diplomatları, Pakistanın Müasir Dillər Universitetinin dosenti Sərvət Rauf, müdafiə sahəsi üzrə ekspert Əbdul Rəhman, Müslim İnstitutunun ictimaiyyətlə əlaqələr üzrə mütəxəssisi Asif Tanvir Avan, eləcə də, Pakistanın ictimaiyyət və KİV nümayəndələri iştirak ediblər.
Seminarı giriş sözü ilə açan Müslim İnstitutunun ictimaiyyətlə əlaqələr üzrə mütəxəssisi Asif Tanvir Avan Azərbaycan və Pakistanın dost münasibətlərindən bəhs edib. Həmçinin ölkələrimiz arasında diplomatik əlaqələrin qurulmasının 30-cu ildönümü münasibətilə hər iki ölkə xalqını təbrik edib.
Tədbirdə çıxış edən Azərbaycanın Pakistandakı səfiri Xəzər Fərhadov iki ölkə arasında diplomatik münasibətlərin qurulmasının 30-cu ildönümünün qeyd olunduğunu vurğulayaraq ötən 30 il ərzində Azərbaycan və Pakistan əlaqələrinin yüksələn xətt üzrə inkişaf etdiyini diqqətə çatdırıb. Xəzər Fərhadov Vətən müharibəsindən söhbət açaraq 2020-ci ildə Azərbaycan Silahlı Qüvvələrinin Ali Baş Komandanı, Prezident İlham Əliyevin rəhbərliyi ilə Ordumuzun torpaqlarımızı erməni işğalından azad etdiyini vurğulayıb və bu müharibə dövründə, eləcə də keçmiş Dağlıq Qarabağ münaqişəsi dövründə Pakistan hökuməti və xalqı tərəfindən ölkəmizə göstərilən siyasi və mənəvi dəstəyə görə qardaş Pakistana təşəkkürünü ifadə edib. Diplomatik münasibətlərin 30-cu ildönümü ərəfəsində Pakistan Senatı tərəfindən ilk dəfə olaraq yekdilliklə qəbul olunmuş Azərbaycanın beynəlxalq səviyyədə tanınan ərazi bütövlüyünə dəstəyi ifadə edən, Xocalı soyqırımını qınayan, diplomatik münasibətlərin qurulmasının 30-cu ildönümünü təbrik edən, həmçinin qarşılıqlı əlaqələrin daha da gücləndirilməsini təşviq edən qətnaməyə istinad edən səfir bu qətnamənin iki ölkə arasındakı qardaşlıq münasibətlərinin bariz nümunəsi olduğunu xüsusi vurğulayıb. Diplomat Azərbaycan-Pakistan münasibətlərinin daha da dərinləşdirilməsi istiqamətində işlərin aparıldığını qeyd edib və nümunə olaraq Pakistan vətəndaşları üçün asan viza sisteminin mövcud olmasını, Karaçi, Lahor və İslamabaddan Bakı şəhərinə birbaşa uçuşların başlamasını, Hökumətlərarası Birgə Komissiyanın tərkibində yaradılan 10 işçi qrupunun, eləcə də hazırda İslamabad Ticarət və Sənaye Palatasının 120 nəfərə yaxın iş adamından ibarət nümayəndə heyətinin Bakıda işgüzar səfərdə olmasını diqqətə çatdırıb.
ADU-nun elm və innovasiya məsələləri üzrə prorektoru professor Novruz Məmmədov seminarda çıxış edərək Azərbaycan və Pakistan münasibətlərindən danışıb. Pakistanın Azərbaycana 44 günlük Vətən müharibəsi zamanı göstərdiyi siyasi və mənəvi dəstəyin yüksək qiymətləndirildiyini bildirib və Azərbaycan-Pakistan-Türkiyə bayraqlarının ölkəmizdə dalğalandığını qonaqların diqqətinə çatdırıb. Diplomatik əlaqələrin qurulmasının 30-cu ildönümünün qeyd olunduğu bir zamanda Pakistanın Müasir Dillər Universitetinin Azərbaycan Dili və Mədəniyyəti Mərkəzinin fəaliyyətə başladığını vurğulayan Novruz Məmmədov bu Mərkəzin iki ölkə arasında elm və mədəniyyət sahəsində əlaqələrin daha da dərinləşməsinə öz töhfəsini verəcəyini qeyd edib. Novruz Məmmədov yubiley münasibətilə öz təbriklərini çatdıraraq dost və qardaş ölkələrimiz arasında bütün sahələr üzrə əməkdaşlıqların bundan sonra da inkişaf edəcəyinə əminliyini bildirib.
Seminarda çıxış edən Milli Məclisin deputatı, ADU-nun sosial məsələlər üzrə prorektoru Tamam Cəfərova ilk öncə Vətən müharibəsi dövründə Pakistan hökuməti, parlamenti və xalqı tərəfindən Azərbaycana göstərilən siyasi və mənəvi dəstəyi vurğulayıb, bu dəstəyə görə öz təşəkkürünü bildirib. Azərbaycanın və Pakistanın hər zaman beynəlxalq arenada bir-birini dəstəklədiyini qeyd edən deputat keçmiş Qarabağ münaqişəsi ilə bağlı BMT Təhlükəsizlik Şurasının Ermənistan qoşunlarının işğal edilmiş Azərbaycan ərazilərindən qeyd-şərtsiz çıxmasını tələb edən 822 saylı qətnaməsinin qəbul edildiyi iclasa məhz Pakistanın sədrlik etdiyini tədbir iştirakçılarının diqqətinə çatdırıb. Tamam Cəfərova ölkələrimiz arasındakı əlaqələrin strateji tərəfdaşlıq səviyyəsinə çatmasında hər iki ölkə rəhbərlərinin rolunu xüsusi vurğulayıb. O, Azərbaycan Respublikasının Birinci vitse-prezidenti Mehriban Əliyevanın təşəbbüsü ilə Heydər Əliyev Fondunun Pakistanda həyata keçirdiyi humanitar layihələrdən də danışaraq bu layihələrin iki ölkə arasındakı münasibətlərin daha da dərinləşməsinə xüsusi töhfə verdiyini bildirib və Mehriban Əliyevanın bu fəaliyyətlərinə görə Pakistanın ən ali dövlət mükafatı “Hilal-e-Pakistan” ordeni ilə təltif olunduğunu qeyd edib. Azərbaycan Dillər Universitetində açılmış Pakistan Mədəniyyət Mərkəzinin və Pakistanın Müasir Dillər Universitetində fəaliyyətə başlamış Azərbaycan Dili və Mədəniyyəti Mərkəzinin önəmindən bəhs edən prorektor bu mərkəzlərin hər iki ölkə gəncləri arasında əlaqələri daha da gücləndirəcəyini, eləcə də Azərbaycan və Pakistan dillərinin, ədəbiyyatlarının öyrənilməsinə kömək edəcəyini diqqətə çatdırıb.
Tədbirin digər məruzəçiləri - Pakistanın Müasir Dillər Universitetinin professoru Sərvət Rauf, bu ölkənin müdafiə sahəsi üzrə eksperti Əbdul Rəhman da çıxışları əsnasında iki ölkə arasındakı dostluq və qardaşlıq münasibətlərindən bəhs ediblər, Pakistanın Ermənistanı işğalçılıq siyasətinə görə bir dövlət kimi tanımadığını bildiriblər. Onlar, həmçinin Azərbaycan torpaqlarının erməni işğalından azad olunması və diplomatik əlaqələrin qurulmasının 30-cu ildönümü münasibətilə təbriklərini çatdırıblar.