İspaniyada su və energetika problemlərinin həllini axtaracaqlar
Bakı, 20 yanvar (AZƏRTAC). Bazar ertəsi İspaniyanın Saraqosa şəhərində su və enerji təchizatı arasında qarşılıqlı əlaqə mövzusunda beynəlxalq konfrans açılmışdır. Konfrans martın 22-də qeyd edilən ümumdünya sülh günü ərəfəsində keçirilir.
Əhalinin sürətlə artması şəraitində enerjiyə və suya tələbat günbəgün artmaqdadır. Proqnozlara görə 2050-ci ilə qədər Yer kürəsi əhalisinin sayı 9 milyarda çatacaqdır. İnkişaf etməkdə olan ölkələrdə iqtisadi artım, həyat səviyyəsinin yüksəlməsi və iqlim dəyişmələri bu problemin miqyasını daha da artırır.
Bu gün Yer kürəsi əhalisinin təxminən 1,5 milyard nəfərinin elektrik enerjisi ilə təmin olunması, 768 milyon insanın su təchizatı ilə bağlı problemləri vardır.
BMT mütəxəssislərinin fikrincə, su və enerji təchizatı məsələləri bir-biri ilə sıx əlaqədardır. Enerji istehsal edilməsi üçün külli miqdarda su tələb olunur. Məsələn, 2010-cu ildə dünyada içməli suyun 15 faizi bunun üçün sərf edilmişdir.
“Su və enerji əlbir olduğu kimi, biz də əlbirik” - bu deviz altında keçirilən konfransın iştirakçıları bu sahədə əməkdaşlıq imkanlarını müzakirə edəcəklər.
Bölmənin digər xəbərləri
