İSRAİLDƏ “FORMULA-3” MOTOYÜRÜŞ YOLU ÇƏKİLƏCƏKDİR
AZƏRTAC xəbər verir ki, daşınmaz əmlakın qiymətləndirilməsi üzrə 45 yaşlı mütəxəssis Sion Ofriyə və motoyürüşçü 42 yaşlı İlan Aarona məxsus “Park motori le-Adraxa” şirkəti Neqev səhrasında motorlu idman mərkəzinin tikintisi üzrə tenderi udmuşdur.
Mərkəzin tikintisi motorlu idman növləri haqqında qanun 2005-ci ildə Knesset tərəfindən qəbul edildikdən sonra dərc olunmuş 12 yeni qərar təsdiq olunduqdan dərhal sonra başlanacaqdır. Mərkəz Beer-Şeva şəhərinin şimal-qərbində Sde-Tayman aerodromunun yaxınlığında yerləşəcəkdir.
Parkın ümumi sahəsi 806 min kvadratmetrdir. 80 min kavadratmetr təhlükəsiz idarəetmə təlimi mərkəzinin yaradılmasına ayrılacaqdır. Daha 220 min kvadratmetr kartinq yolları, WRC ralliləri üçün ayrılacaq. 20 min kvadratmetr ticarət və turizm obyektləri, mehmanxana, mağazalar, sərgi zalları, restoranlar, benzindoldurma məntəqəsi və şadlıq salonu üçün nəzərdə tutulmuşdur. Qalan ərazidə (təqribən 500 min kvadratmetr) “Formula-3” yürüş yolu çəkiləcəkdir.
Layihənin dəyəri təqribən 100 milyon şekeldir. Yeni motorlu idman mərkəzi ölkənin cənub bölgəsinin sakinləri üçün təqribən 460 iş yeri yaradacaqdır. Şirkətin nümayəndələri artıq bildirmişlər ki, bu cür qurğuların inşa edilməsi sahəsində təcrübəsi olan xarici şirkətlərlə əlaqə yaratmışlar.
Bölmənin digər xəbərləri
