MƏDƏNİYYƏT
İstanbulda keçirilən konfransda Orta əsr Ağsu şəhərinin xarabalıqlarını nümayiş etdirən poster böyük maraq doğurub
“Miras” Mədəni İrsin Öyrənilməsinə Kömək İctimai Birliyindən (İB) AZƏRTAC-a bildiriblər ki, konfransda 2800 iştirakçı 4 gün ərzində “Birləşən dənizlər - sərhədləri aşaraq”, “Arxeoloji irsin idarə olunması - keçmişdə və hazırda”, “Qədim texnologiyalar sosial kontekstdə”, “Ətraf mühit və yaşam: geosfer, ekosfer və bəşəri qarşılıqlı əlaqələr”, “Dəyişmə zamanı: dağılma və çevik təkanlar” və digər mövzular ətrafında müzakirələr aparıb.
Konfrans çərçivəsində bir sıra görüşlər keçirilib, sərgilər nümayiş etdirilib.
Konfransda Azərbaycanı təmsil edən “Miras” Mədəni İrsin Öyrənilməsinə Kömək İctimai Birliyinin sədri, tarix üzrə fəlsəfə doktoru Fariz Xəlilli və İB-nin üzvü Gülşən Hüseynova “Orta Əsr Ağsu Şəhəri Arxeoloji Turizm Kompleksi mədəni irsin idarə olunması modeli kimi” mövzulu posterlə iştirak ediblər. Eyni zamanda, sözügedən sahələr üzrə müasir meyllərin öyrənilməsi və tətbiqi ilə bağlı fikir mübadiləsi aparıblar.
Bildirilib ki, Orta Əsr Ağsu Şəhəri Arxeoloji Turizm Kompleksində qazıntılar zamanı tapılmış abidə və eksponatların təsviri, texniki göstəriciləri, əhəmiyyətliliyi, ilkin və müasir vəziyyəti, dağıntı səviyyəsi, onunla bağlı folklor nümunəsi də daxil olmaqla, elektron məlumat bazası üzərində işin aparılmasına başlanılıb.
Diqqətə çatdırılıb ki, arxeoloji qazıntılar zamanı aşkar edilmiş tapıntıların elektron siyahısı sistemləşdirilir. Mülkiyyət formalarının, ekskursiya marşrutlarının müəyyənləşdirilməsi, fiziki imkanları məhdud olan tamaşaçıların burada rahat hərəkəti və xidmətlərdən tam istifadəsi, kompleksdə arxeoloji ekspedisiyaların təşkili və s. idarəetmə planının əsas məqamlarıdır.
Konfrans iştirakçılarının diqqətinə çatdırılıb ki, kompleksdə arxeoloji irsi idarəetmədə yeniliklərin tətbiqi məqsədilə müvafiq ali təhsil ocaqlarının müəllim və tələbələrinin cəlb edilməsi nəzərdə tutulur. Kompleksdən bədii, sənədli filmlərin, kliplərin çəkilişi üçün poliqon kimi istifadə etmək məqsədilə müvafiq təbliğat işləri aparılır. Gələcəkdə sənətkarlıq emalatxanalarının qurulması, məktəblilərin və tamaşaçıların burada öz əlləri ilə müəyyən əşyaların hazırlamasına şərait yaradılması planlaşdırılır. Kompleksdə sərgi, moda nümayişi, sənət festivalları, fotosərgi, müsabiqələr, ustad dərsləri təşkil olunur. Yerli sənət nümunələrinin və sənətkarların təbliği məqsədilə xüsusi ustad dərsi, “Böyük İpək Yolu”, “Karvan yolu”, “Ağsu şəhəri Şərqlə Qərb arasında ticarət körpüsüdür” mədəni irs turları nəzərdə tutulub. Bütün bunlar arxeoloji irsin idarə olunmasında əsas halqaları təşkil edir.
Posterə göstərilən maraq ölkəmizin bu sahədə təcrübəsinin yararlılığından xəbər verirdi.