İSTANBULDA PARTLAYIŞLAR BAŞ VERMİŞDİR

15.11.2003 [16:00]
Çap et
A⁺ A^-

AZƏRTAC-ın müxbiri xəbər verir ki, noyabrın 15-də yerli vaxtla saat 9.30 radələrində İstanbulun Şişli və Bəyoğlu rayonlarında iki güclü partlayış baş vermişdir. Hadisə yerlərinə çox sayda polis, yanğınsöndürən və təcili yardım dəstələri gəlmişdir. İlkin məlumatlara görə 15 nəfər həlak olmuş, 100-ə yaxın vətəndaş yaralanmış və xəstəxanalara aparılmışdır.

Hər iki partlayış İsrail sinaqoqlarının yaxınlığlnda baş vermişdir. Bəyoğlundakı “Neve Şalom” və Şişlidəki “Beth İsrail” sinaqoqları böyük zərər çəkmişdir. Partlayışlar nəticəsində 50-dən artıq dükan tamamilə dağılmışdır. Partlayış yerlərində aparılan ilkin araşdırmalardan sonra mütəxəssislər bunların qaz sızıntısı deyil, planlaşdırılmış terror aktları olduğunu bildirmişlər. Terror aktlarının radikal dindar təşkilatlar tərəfindən törədildiyi ehtimal olunur.

Qeyd edək ki, Anadolu Ajansına telefonla zəng edən naməlum şəxs bu partlayışların radikal dini İBDA-C terror təşkilatı tərəfindən törətdildiyini söyləmişdir. Digər tərəfdən partlayışlarda “Əl-Qaidə” terror təşkilatının əli olduğu barədə də şübhələr vardır.

Terror aktları İsraildə də böyük əks-səda yaratmışdır. Frans-Press informasiya agentliyinin yaydığı məlumata görə İsrail hökuməti hadisələrlə əlaqədar hər cür kömək göstərməyə hazır olduğunu vurğulamışdır.

İSTANBULDA PARTLAYIŞLAR BAŞ VERMİŞDİR

MÜƏLLİFLƏ ƏLAQƏ

Bölmənin digər xəbərləri