İstedadın apardığı yol
Bakı, 12 yanvar, AZƏRTAC
… Hər şey 1980-ci ilin yay günündən başladı. Əşrəf müəllimin musiqi məktəbində oxuyan qızı Nigara “Belarus” markalı fortepiano almağı 7 yaşlı oğlu Dəyanəti hamıdan çox sevindirmişdi. O, barmaqları fortepianonun şirmayı dillərinin üstündə gəzən bacısının çaldığı musiqiləri dinləyir, arada özü də ağ-qara dillərə toxunaraq onlardan çıxan qeyri-adi səslərə qulaq kəsilirdi. Dəyanətin bu marağı heç də əbəs deyilmiş...
Musiqiyə həvəsi, məktəbdə nəğmə dərslərində göstərdiyi fəallıq, təhsil müəssisəsində keçirilən tədbirlərdə iştirakı onu Beyləqandakı 2 nömrəli orta məktəbdə hamının sevimlisinə çevirmişdi. Məktəb tədbirlərində hamı onun ifa etdiyi mahnıları gözləyir və maraqla qulaq asırdı.
DOST İnklüziv İnkişaf və Yaradıcılıq Mərkəzinin təlimçisi Dəyanət Məmmədov AZƏRTAC-ın müxbiri ilə söhbət zamanı həmin illəri xatırlayaraq deyib: “O vaxt tanınmış incəsənət xadimləri, o cümlədən Şövkət Ələkbərova, İslam Rzayev, Cabir Novruz və başqa sənətkarlardan ibarət münsiflər heyəti rayonlarda olan istedadlara qulaq asır, seçim turlarında onların ifalarına qiymət verirdilər. Bir neçə mərhələdən ibarət həmin turun son mərhələsindən uğurla keçsəm də, atam mənim Bakıda xüsusi internat məktəbində təhsil almağıma razılıq vermədi. Hətta o da yadımdadır ki, buna görə münsiflər heyətinin üzvləri ilə atam arasında narazılıq da yaşandı...”.
O vaxt Əşrəf müəllim münsiflərə oğlunun hemofiliya xəstəsi olduğuna görə Bakıda təhsil almasına etiraz etmişdi. Ata onu valideyn nəzarətindən kənarda qoymaq istəmirdi.
Dəyanətin musiqiyə olan marağı onu rayondakı 7 illik musiqi məktəbinə apardı. Həmin məktəbin fortepiano sinfini, orta məktəbi də bitirib əmək fəaliyyətinə ticarətçi kimi başladı. Lakin Əməkdar müəllim Fatma xanım oğlunun istedadının itməsini istəmirdi. Onun təkidi ilə 1996-cı ildə Dəyanət imtahanlardan uğurla keçərək Musiqi Akademiyasına qəbul olundu. Təəssüf ki, xərçəng xəstəsi olan Fatma xanım həmin vaxt həyatla mübarizə aparırdı. Ana oğlunun tələbə adını qazandığını eşidəndən sonra dünyaya gözlərini yumdu...
Dəyanət Məmmədov 2000-ci ildə akademiyanın vokal şöbəsini bitirib. Bir neçə il Füzuli rayonundakı Aşağı Yağlıvənd uşaq musiqi məktəbində dərs deyib. İfasında səslənən mahnılardan ibarət “Axşam düşəndə” adlı musiqi albomu da çıxıb. Ötən ilin dekabrında isə DOST İnklüziv İnkişaf və Yaradıcılıq Mərkəzinin musiqi rəhbəri Vüqar Camalzadə onu mərkəzdə işləməyə dəvət edib. İndi o, bir ildən artıqdır ki, mərkəzdə təlimçi işləyir.
“Mərkəzdə şəhid ailəsi üzvləri, qazi övladları və aztəminatlı ailələrdən olan sağlamlıq problemləri olan uşaqlarla məşğul oluram. Həssas təbəqəyə məxsus həmin uşaqlarda kiçik bir potensial, lap xırda bir qığılcım varsa, onu üzə çıxarmağa, öyrətməyə və bu yolla cəmiyyətə inteqrasiya etməyə çalışırıq. Hazırda iki istedadlı ifaçı ilə işləyir, onların musiqi bacarığını, ifaçılıq qabiliyyətinin təkmilləşməsinə çalışırıq”, - deyə Dəyanət bildirir. O, mərkəzin xətti ilə keçirilən bütün tədbirlərdə səhnəyə çıxır, repertuarında olan klassik və bəstəkar mahnılarını məharətlə ifa edir.
İkinci qrup əlil olan Dəyanət indi iki övlad atasıdır. 9 yaşlı qızı Fidan isə “Hicaz” qrupu ilə çıxış edir. Deməli, atanın keçdiyi sənət cığırları ilə daha bir addımlayan var...
Bölmənin digər xəbərləri
