İsveçdə qeyri-qanuni IPTV-dən istifadəyə görə cəza tətbiqi təklif edilir
Stokholm, 1 oktyabr, Nərgiz Cəfərli, AZƏRTAC
Dövlət müstəntiqi Yeva Bergkvist İsveçdə qeyri-qanuni IPTV-dən (interaktiv televiziya) istifadəyə görə cəza tətbiqi təklif edib. Onun sözlərinə görə, ölkədə ev təsərrüfatlarının 15 faizinə qədəri belə xidmətlərdən istifadə edir ki, bu da ciddi problem hesab olunur.
AZƏRTAC xəbər verir ki, qanun layihəsi istifadəçilər üçün cərimələr və qeyri-qanuni xidmətlər satanlar üçün sərtləşdirilmiş cəzanı nəzərdə tutur. Polis, prokurorluq, vergi idarəsi, patent və qeydiyyat idarəsinin bu halla mübarizəni gücləndirəcəyi planlaşdırılır.
Hesabatda, həmçinin İP səviyyəsində qeyri-qanuni yayımların qarşısının alınması, eləcə də bu cür xidmətlərə reklam və ödənişlərin məhdudlaşdırılmasına dair tədbirlər təklif edilir. Oxşar həllər artıq digər Avropa ölkələrində tətbiq olunur.
Y.Bergkvist qeyri-qanuni IPTV-nin təkcə iqtisadi deyil, həm də potensial təhlükəsizlik təhdidi yaratdığını vurğulayıb. “Süni intellektdən istifadə etməklə saxtalaşdırıla bilən xəbər yayımlarını yalnız təsəvvür etmək olar”, - deyə o bildirib.
Mədəniyyət naziri Parisa Liljestrand bəyan edib ki, hökumət tez hərəkət etmək niyyətindədir və ən qısa zamanda hesabatı nəzərdən keçirmək üçün təqdim edəcək.
Bölmənin digər xəbərləri
