DÜNYA
İtaliyada 95 yaşlı aktrisa və 75 yaşlı keçmiş Formula 1 pilotu senator olmaq üçün namizəd göstərilib
Roma, 24 avqust, AZƏRTAC
İtaliyada 95 yaşlı aktrisa Gina Lollobrigida və 75 yaşlı keçmiş Formula 1 çempionu pilot Emerson Fittipaldi senator olmaq üçün namizəd göstərilib.
AZƏRTAC xəbər verir ki, İtaliyada sentyabrda keçiriləcək növbədənkənar ümumi seçkilərdə iştirak edəcək siyasi partiyalar öz namizədlərinin siyahısını açıqlayıb. Antisistem və kommunist baxışlı 5 partiyanın birgə yaratdığı ittifaq “Xalq və Suveren İtaliya” Partiyasının Latina şəhərindən senator postuna namizədi olan G.Lollobrigida 1950-1970-ci illərdə Hollivud kinosunun görkəmli simalarından birinə çevrilib. O, siyasətə qoşulmaqla bağlı ilk cəhdində 1999-cu ildə İtaliyanın keçmiş Baş naziri Romano Prodinin “Demokratlar Partiyası”ndan Avropa Parlamentinə seçkilərdə namizəd olub, lakin ümumilikdə 10 min səs toplayaraq seçkilərdən kənarda qalıb. İtaliyalı aktrisanın mitinqlərə videolar göndərməklə seçki kampaniyasını aparacağı bildirilir.
1972-ci və 1974-cü illərdə Formula 1-də pilotlar çempionluğunu qazanan E.Fittipaldi isə seçkilərdə ifrat sağçı “İtaliya Qardaşları” Partiyası tərəfindən namizəd göstərilib. Həm İtaliya, həm də Braziliya vətəndaşlığı olan E.Fittipaldi seçkilərdə senator postuna namizəd olmaqdan məmnunluğunu ifadə edib, italyanlardan, braziliyalılardan və Latın Amerikasında yaşayanlardan dəstək gözlədiyini deyib.
Bundan başqa, İtaliyanın sabiq Baş naziri və “İrəli İtaliya” Partiyasının rəhbəri Silvio Berluskoninin nişanlısı Marta Antonia Faskinanın Siciliyanın Marsala şəhərindən senator postuna namizədliyi irəli sürülüb. 2018-ci ildən “İrəli İtaliya” Partiyasından deputat olan 32 yaşlı A.Faskina partiyasının 2020-ci ildəki yazılı açıqlamasında 85 yaşlı S.Berluskoninin nişanlısı olduğu açıqlanıb.
Qeyd edək ki, sentyabrın 25-də İtaliyada keçiriləcək növbədənkənar ümumi seçkilərdə parlamentdə 400 və Senatda isə 200 olmaqla ümumilikdə 600 parlamentari seçiləcək. Rəy sorğularına əsasən, Giorgia Meloninin rəhbərlik etdiyi ifrat sağçı “İtaliya Qardaşları” Partiyası, Matteo Salvininin rəhbəri olduğu “Liqa” Partiyası, Silvio Berluskoninin rəhbərlik etdiyi “İrəli İtaliya” Partiyası və bəzi kiçik partiyalardan ibarət sağ mərkəzçi alyans seçkilərdə qalib gələcək və hökuməti formalaşdıracaq.
Nihad Budaqov
AZƏRTAC-ın xüsusi müxbiri
Roma