İtaliyada Qurtuluş Günü qeyd edilir
Roma, 25 aprel, AZƏRTAC
Aprelin 25-də İtaliyada Qurtuluş Günü qeyd olunur.
AZƏRTAC xəbər verir ki, İtaliya Prezidenti Sercio Mattarella bu münasibətlə paytaxt Romadakı “Altare della Patria” memorial kompleksində naməlum əsgər abidəsini ziyarət edib, abidə önünə əklil qoyub.
Mərasimdə İtaliyanın Baş naziri Ciorcia Meloni, Senatın sədri İqnazio Benito Maria La Russa, Deputatlar Palatasının sədri Lorenzo Fontana, müdafiə naziri Quido Krosetto və digər rəsmi şəxslər iştirak ediblər.
Sercio Mattarella Qurtuluşun 78-ci ildönümü münasibətilə Romanın Kuirinale sarayında döyüşçü və silahlı birliklərin nümayəndələri ilə görüşüb.
Qeyd edək ki, 25 aprel tarixi İkinci Dünya müharibəsi zamanı faşist hökumətinə qarşı aparılan hərbi-siyasi müqavimətin və İtaliya ərazisinin tam azad edilməsi ilə nəticələnən qələbənin simvolu hesab olunur. Hər il aprelin 25-i İtaliyada milli bayram kimi qeyd edilir.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
