ELM VƏ TƏHSİL
İyirmi ildə 200 ilin problemi həll edildi - ŞƏRH
![İyirmi ildə 200 ilin problemi həll edildi - ŞƏRH](/files/2023/3/1200x630/1698834604765450665_1200x630.jpg)
Bakı, 1 noyabr, AZƏRTAC
Prezident İlham Əliyevin Azərbaycana rəhbərlik etdiyi 20 il ərzində Azərbaycanın ümumi daxili məhsulu bir neçə dəfə artıb, bütün mənbələr hesabına ölkə iqtisadiyyatına investisiyalar yatırılıb, Azərbaycanda makroiqtisadi tarazlıq və sabitlik təmin olunub, dayanıqlı və davamlı inkişaf üçün möhkəm zəmin yaradılıb, ölkənin iqtisadi təhlükəsizliyinin təmin olunması istiqamətində mühüm tədbirlər həyata keçirilib.
Bu fikirləri AZƏRTAC-a açıqlamasında UNEC-in inzibati və təşkilati məsələlər üzrə prorektoru dosent Şaiq Əsgərov söyləyib.
Prorektor qeyd edib ki, son 20 il ərzində iqtisadi sahədə böyük yol qət edən və Cənubi Qafqazın lider dövlətinə çevrilən Azərbaycanda bütün istiqamətlərdə müsbət dəyişikliklər aydın görünür. Danılmaz həqiqətdir ki, nəticəyə söykənən praqmatik iqtisadi islahatların bazasında milli maraqlara əsaslanan dayanıqlı xarici siyasət, rifaha və sosial inkişafa hədəflənən, davamlı və ardıcıl tərəqqiyə fokuslanan daxili siyasət və konturları Ümummilli Lider Heydər Əliyev tərəfindən müəyyən olunan və bu gün də innovativ şəkildə tətbiq edilən iqtisadi inkişafın Azərbaycan modeli dayanır. Keçən bu müddət ərzində ölkəmizdə neft və qaz layihələri ilə yanaşı, nəqliyyat infrastrukturu da qurulub, beynəlxalq əhəmiyyətli dəmir yolu, dəniz və hava limanları inşa edilib. Bir sözlə, Prezident İlham Əliyevin apardığı uğurlu siyasət nəticəsində ölkəmiz özünün enerji, nəqliyyat, logistika və kommunikasiya qovşağı ilə regionun və dünyanın əhəmiyyətli bir mərkəzi hesab edilir.
“Son 20 ildə Prezident İlham Əliyevin həyata keçirdiyi dövlət proqramları və iqtisadi layihələr nəticəsində ölkəmizin iqtisadi inkişaf dinamikası daim artıb. Bunu biz ümumi daxili məhsulun, xarici ticarət dövriyyəsinin, xarici valyuta ehtiyatlarının, qeyri-neft ixracının həcminin artmasında, yeni elektrik stansiyalarının tikilməsində, su anbarlarının tikintisində və su təchizat sisteminin yenidən qurulmasında, yeni yol infrastrukturlarının qurulmasında, çoxsaylı körpü və yol ötürücülərinin tikintisində, təhsil, səhiyyə, mədəniyyət ocaqlarının tikintisi və yenidən qurulmasında və s. görə bilərik. Bununla yanaşı, Azərbaycan dünyanın o ölkələrindəndir ki, kosmik sənayesi inkişaf edir və hazırda “Azerspace-1”, “Azersky” və “Azerspace-2” peykləri uğurla fəaliyyət göstərir”, - deyə Ş.Əsgərov bildirib.
Əhalinin sosial-iqtisadi rifahının yaxşılaşdırılmasının, vətəndaşların sosial müdafiəsinin, sosial-təminat məsələlərinin də prioritet məsələlərdən olduğunu deyən prorektor qeyd edib ki, hər il dövlət büdcəsi tərtib edilərkən onun sosial yönümlü olmasına xüsusi diqqət yetirilir. Bunlarla yanaşı, ölkədə yoxsulluğun azaldılması, əhalinin məşğulluq imkanlarının və işsizliyin aradan qaldırılması, şəhid ailələrinin, əlillərin, müharibə iştirakçılarının sosial-məişət şəraitinin yaxşılaşdırılması istiqamətində ciddi tədbirlər görülüb. Danılmaz həqiqətdir ki, iqtisadi artım müşahidə olunan əksər ölkələrdə iqtisadiyyatın dövlət tənzimlənməsi, idarəetmə xərclərinin minimallaşdırılması və məsrəflərə qənaət problemlərinə elə də ciddi önəm verilmir. Lakin iqtisadi durğunluq və tənəzzül baş verdikdə məsrəflərin tənzimlənməsi və idarə olunması məsələləri aktuallıq qazanır. Doğrudur, Azərbaycan iqtisadiyyatında dünya praktikasında analoqu olmayan iqtisadi artımın müşahidə edilməsi heç də idarəetmə xərclərinin optimallaşdırılması məsələlərini arxa plana çəkməyib. Dünya iqtisadi böhranının başlandığı andan praqmatik siyasət yürüdən Prezident Azərbaycanın iqtisadi böhrandan az itki ilə çıxmasına nail olub.
Bütün bunlarla yanaşı, Prezident İlham Əliyev Müasir Azərbaycan tarixinə şanlı səhifələr yazıb. Özünün dediyi kimi, “Nəyi, necə, nə vaxt etmək lazımdır, bunu mən bilirəm. Yaxın tarix dəfələrlə bunu göstərib, həm siyasi müstəvidə, diplomatik müstəvidə, eyni zamanda döyüş meydanında nəyi ediriksə, dəqiqliklə edirik”. Bütün bunları biz 44 günlük Vətən müharibəsində qazanılan qələbə və 23 saatlıq antiterror tədbirləri nəticəsində ölkəmizin ərazi bütövlüyünün təmin edilməsi ilə gördük. Prezident İlham Əliyev bununla Azərbaycan xalqının qürurunu bərpa etdi və Ermənistanın 200 illik işğal siyasətinə 20 illik fəaliyyəti dövründə birdəfəlik son qoydu. Hazırda işğaldan azad edilmiş torpaqlarda bərpa və quruculuq işləri geniş vüsət alıb. Qısa bir zamanda Qarabağda və Şərqi Zəngəzurda böyükmiqyaslı layihələr həyata keçirilir. Prezident İlham Əliyevin qeyd etdiyi kimi, bütün Qarabağ bölgəsini Azərbaycanın ən gözəl bölgələrindən birinə çevirəcəyik. Burada yenidən həyat canlanacaq, bütün rayonlarımız bərpa olunacaq, vətəndaşlarımız öz doğma yurd-yuvalarında yaşayıb, yaradacaqlar.
Hazırda yeni salınmış yaşayış məntəqələrinə məcburi köçkünlərin qaytarılması prosesi davam edir. Qarabağ və Şərqi Zəngəzurda əhalinin tam məskunlaşacağı gün uzaqda deyil.
AZƏRTAC-0-
(XC, GA)