RƏSMİ XRONİKA
İYULUN 13-Ü – BAKI-TBİLİSİ-CEYHAN BORU KƏMƏRİNİN RƏSMİ AÇILIŞI HEYDƏR ƏLİYEVİN NEFT STRATEGİYASININ TƏNTƏNƏSİ, ÜÇ DƏNİZ ƏFSANƏSİNİN REALLIĞA ÇEVRİLDİYİ GÜNDÜR
AZƏRBAYCAN PREZİDENTİ İLHAM ƏLİYEVİN TÜRKİYƏYƏ SƏFƏRİ
CEYHANDA “TÜRKİYƏ-AZƏRBAYCAN QARDAŞLIĞI PARKI”NIN TƏNTƏNƏLİ AÇILIŞI
Xəbər verdiyimiz kimi, iyulun 13-də Azərbaycan Prezidenti İlham Əliyev və Türkiyənin Baş naziri Rəcəb Tayyib Ərdoğan Ceyhan şəhərində ulu öndər Heydər Əliyevin adını daşıyan “Türkiyə-Azərbaycan qardaşlığı parkı”nın təntənəli açılışında iştirak etmişlər.
Dövlətimizin başçısını və dost ölkənin Baş nazirini buraya toplaşan minlərlə sakin böyük hörmət və hərarətlə, gül-çiçəklə qarşıladı. Ətraf binada türk dünyasının dahi şəxsiyyətləri Atatürkün və Heydər Əliyevin portretləri, Azərbaycanın və Türkiyənin dövlət bayraqları asılmışdı. Azərbaycan Prezidentini salamlayan, hər iki qardaş ölkənin birliyini vurğulayan şüarlar diqqəti cəlb edirdi.
Ceyhan şəhərinin mərkəzi küçəsində yerləşən bu istirahət guşəsi müasirliyi, gözəlliyi və sakinlərin asudə vaxtlarını səmərəli keçirməsi üçün yaradılan şərati ilə göz oxşayır. Parkda ulu öndərlər Atatürkün və Heydər Əliyevin abidələri ucaldılmış, heykəllərin arxasındakı lövhədə isə Türkiyənin və Azərbaycanın xəritələrinin üzərində iki dost, qardaş ölkənin qədimliyini əks etdirən tarix-mədəniyyət abidələrinin şəkilləri, Atatürkün və Heydər Əliyevin “Azərbaycanın kədəri bizim kədərimiz, sevinci bizim sevincimizdir”, “Biz bir millət, iki dövlətik” müdrik kəlamları yazılmışdır. Abidə kompleksi Azərbaycan və Türkiyə memarları və mütəxəssisləri tərəfindən hazırlanmışdır.
Prezident İlham Əliyev və Baş nazir Rəcəb Tayyib Ərdoğan türk dünyasının dahi şəxsiyyətləri Mustafa Kamal Atatürkün və Heydər Əliyevin abidələri önünə gül dəstələri qoydular, kompleksi seyr etdilər.
Mərasimi Ceyhan bələdiyyəsinin başçısı HÜSEYN SÖZLÜ açaraq dedi:
-Qardaş Azərbaycanın çox hörmətli Prezidenti İlham Əliyev!
Türkiyə Cümhuriyyətinin hörmətli Baş naziri!
Hörmətli nazirlər, millət vəkilləri, valilər!
Hörmətli qonaqlar, sevimli ceyhanlılar!
Bu gün Bakı-Tbilis-Ceyhan boru xəttinin açılışı münasibətilə tarixi bir günü yaşayırıq. Biz, dəyərli həməvətənlərimizin arzusu ilə gerçəkləşdirdiyimiz “Türkiyə-Azərbaycan qardaşlığı parkı”nda türk millətinin iki dəyərli övladının - ulu öndərimiz, qurucumuz Atatürkün və Azərbaycanın ulu öndəri, qurucusu Heydər Əliyevin abidələrini də ziyarət edərək, çox şərəfli bir günü qeyd edirik. Mən bütün qonaqlarımza bir daha “Xoş gəlmisiniz!” deyir, dərin sevgi və hörmətimi bildirirəm.
Bu tarixi günü yaşayarkən, həqiqətən də, çox böyük həyəcan içindəyik. Eyni dili danışdığımız, eyni kökdən gəldiyimiz, eyni mədəniyyətin övladları olduğumuz Azərbaycanın möhtərəm Prezidentini bir daha salamlayır və böyük məmnuniyyətlə sözü ona verirəm.